Timur Kapadze: «Durang adolatli natija bo‘ldi»

O‘zbekiston milliy jamoasi bosh murabbiyi Temur Kapadze JCh-2026 saralashidan o‘rin olgan Eron (2:2) bilan o‘yindan so‘ng o‘z fikrlarini bildirdi. 

«Avvalo, Eron milliy jamoasini jahon chempionatiga chiqqani bilan tabriklayman va ularga mundialda ham omad tilayman. O‘yinga kelsak, ikkala jamoada ham imkoniyatlar bo‘ldi. G‘alaba qozonishimiz ham mumkin edi. Umuman olganda, durang adolatli natija bo‘ldi deb o‘ylayman. 

Yigitlarga, muxlislarga va xalqimizga rahmat. Keyingi o‘yinlarga yanada yaxshi tayyorlanib, g‘alaba qozonishga harakat qilamiz. Inshaaloh, biz ham jahon chempionatiga chiqamiz.

Raqibni o‘rgangandik. G‘alaba uchun o‘ynadik va bunga yaqin keldik ham. 3 nafar yetakchi futbolchimiz yo‘qligi biroz ta’sirini ko‘rsatdi. Ehtimol, ular bilan yanada kuchli bo‘lardik. Lekin bu — milliy jamoa. Qolgan o‘yinchilar ham yetakchilarning o‘rnini bildirmaslikka urinishdi. 

Ha, 2018 yil ham bosh murabbiy sifatida O‘zbekiston milliy jamoasini Eronga (0:1) qarshi o‘rtoqlik bahsida boshqarganman. Unda ham forslar kuchli edi va Keyrush bilan jahon chempionatiga chiqib bo‘lgandi. Biz asosan yoshlar  bilan kelgandik. O‘shandagi ayrim futbolchilar hamon har ikki jamoada bor. Biz ham o‘sib boryapmiz. Davlat tomonidan futbolga katta e’tibor berilmoqda. Yanada kuchayib boramiz. Chunki jamoaga ko‘plab yosh iqtidorlar kelmoqda», — deydi Kapadze matbuot anjumanida.