«Real»da kambek, «Siti» 4 ta gol oʻtkazib yutqazdi
|12:315 27213 min
«Real» Rimdagi oʻyinda 7 daqiqada uch gol urib, gʻalabani ilib ketdi; ingliz jamoalari oʻyinlarida hokkeycha (yoki tennischa) hisoblar, Abduqodir Husanov boshlangʻich tarkibga qaytgan oʻyinda «Siti» «PSJ»ga oʻz uyida magʻlub boʻldi. Chorshanba oqshomida YECHL guruh bosqichida boʻlib oʻtgan oʻyinlar va turnir jadvalidagi vaziyat.
Foto: Paolo Bruno/Getty ImagesFoto: Paolo Bruno/Getty Images
15-oktabrga oʻtar kechasi – Chempionlar ligasi tarixidagi eng sermahsul oqshom boʻldi. 9 oʻyinda jamoalar jami 46 gol urishdi: bir oʻyinga oʻrtacha 5 ta gol.
Joze Mourinio tom maʼnoda nostalgiya turnesini oʻtkazmoqda. U birinchi turda sobiq jamoasi «Inter»ga qarshi oʻynagandi. Endi esa yana bir qadrdon jamoasi «Roma» maydonida mehmon boʻldi. Mezbon jamoa muxlislari esa uni bannerlar bilan qarshi olishdi. Bu Mbappe uchun ham oʻziga xos oʻyin edi, u shu kuni Messining rekordini yangilab, asosiy yevrokubokda 100 ta oʻyin oʻtkazgan eng yosh futbolchiga (27 yoshu 298 kunlik) aylandi. Shuningdek, Vinisius ham diqqat markazida edi. Shu kuni la liga rahbariyati braziliyalik futbolchini «Vilyarreal»ga qarshi oʻyindagi harakati uchun toʻrt oʻyinga diskvalifikatsiya qilgani eʼlon qilindi va u endi maʼlum vaqt faqat yevrokubok oʻyinlarida maydonga tushishi mumkin edi.
Yetti yillik tanaffusdan keyin YeChLga qaytgan rimliklar esa oʻyinni koʻtarinki ruhda boshlashdi va Kurtuga ketma-ket ish topib bera boshlashdi. Belgiyalik posbon avvaliga Ermosoning burchakka yoʻnaltirgan zarbasini qaytardi, ammo mezbonlarning navbatdagi hujumida De Ronning zarbasidan keyin yuzaga kelgan rikoshet darvozabonni ilojsiz ahvolda qoldirdi. Besh daqiqa oʻtib esa mezbonlar darvozaboni ham shunday holatga tushdi va Mbappe hisobni tenglashtirdi.
Ikkinchi boʻlimda esa Vinisius antiqahramonga aylandi. U maydon markazida tovoni bilan pas berishga urinib, toʻpni oldirdi, tezkor boshlangan qarshi hujum esa Malen darvozani ishgʻol etishi bilan yakunlandi. Biroz oʻtib niderlandiyalik hujumchi yana bir qarshi hujumda dublni rasmiylashtirdi.
Shundan keyin Mourinioning sabri tugadi va Vinisiusni 59-daqiqadayoq oʻyindan olib tashladi. Maydonni tark etayotganida esa braziliyalik vinger murabbiylar shtabiga ochiq norozilik namoyish etdi. Ammo aynan uning oʻrniga tushgan Endrik oʻyinni oʻzgartirib yubordi. Madridliklar safidagi eng past boʻyli futbolchilardan biri sanalgan hujumchi ikki bor burchak jarimasi vaqtida bosh bilan zarba yoʻlladi, birinchisida darvozabon qaytargan toʻpni Espi baribir darvoza toʻriga kiritdi, ikkinchisida gol Endrikning oʻz nomiga yozildi.
Mavzuga oid
Oʻyinga qoʻshib berilgan daqiqalarda esa navbatdagi burchak toʻpidan keyin Ryudiger sobiq jamoasi darvozasiga gʻalaba golini urdi. Shu tariqa, madridliklar 7 daqiqayu 43 soniya ichida 1:3 hisobini gʻalabaga aylantirishdi. YECHL tarixida bunday qisqa vaqt ichida ikki toʻp farqini yoʻqotib, gʻalabaga erishish hali hech bir jamoaga nasib etmagandi.
Gvardiola «Etihad»ga (tomoshabin sifatida), Abduqodir Husanov esa boshlangʻich tarkibga qaytgan oʻyinda «Manchester Siti» birinchi boʻlimdayoq uchta gol oʻtkazib yubordi. Avvaliga Due fantastik zarbasi bilan hisobni ochdi, keyin esa Usmon Dembelega golli pas yetkazib berdi. 32-daqiqada Vitinya jarima maydoni ichida hech qanday qarshilikka uchramasdan, hisobni yiriklashtirdi.
Tanaffusda Mareska uchtalik almashtirishni amalga oshirdi: birinchi boʻlimda oʻyini chiqmagan Doku, Sherki va Ruben Diash zaxiraga olindi, ularning oʻrniga Ndiay, Buaddi va Nunesh tushirildi, Nunesh oʻng qanotda Husanov oʻrnini egalladi, oʻzbekistonlik himoyachi Diash oʻrniga markazga oʻtdi.
Bu oʻzgarishlar mezbonlarga ijobiy taʼsir qildi va jamoa oʻyinni oʻz qoʻliga ola boshladi. Avvaliga Holand hisobni qisqartirgandi, ammo koʻp oʻtmay Donnarumma toʻrtinchi golni ham oʻtkazib yubordi: u Akliushning xavfli zarbasiga yaxshi reaksiya koʻrsatgandi, ammo toʻp osmonga koʻtarilib, baribir darvoza toʻriga kirib ketdi. Qolgan vaqt davomida mezbonlar toʻliq hujumda oʻynashdi, Holand ikkinchi golini ham urdi, ammo bundan ortigʻiga kuch va vaqt yetmadi. Oʻyinga qoʻshib berilgan daqiqalarda Donnarumma Ferranning penaltidan yoʻllagan zarbasini qaytarib, jamoasini yanada yirik hisobda magʻlub boʻlishdan saqlab qoldi.
LASK bilan oʻyinda mersisaydliklarning yozgi xaridlaridan biri boʻlgan Barkolya superyulduzlardek oʻyin koʻrsatdi. Fransuz vingeri het-trik qayd etib, «PSJ»dan 125 mln yevro va qoʻshimcha bonuslar evaziga xarid qilinishi bejiz boʻlmaganini isbotladi. Oʻyinda boshqa qahramonlar ham bor edi: 21 yoshli hujumchi Lyuis Kumas 1+1 qayd etdi, Frimpongda – 1+2.
LASK ham oʻyinning tomoshabop boʻlishini taʼminladi: mezbonlar taslim boʻlish haqida oʻylashmadi va 5 ta toʻp farqi bilan ortda borayotganiga qaramay, kambek qilishga urinishdi Florian Flekker dubl rasmiylashtirdi. Ivan Dibango esa assistlar boʻyicha het-trikka erishdi.
Unai Emeri jamoasi APLdagi yomon startdan keyin hali vaziyatni yaxshilay olgani yoʻq, ammo jamoa xalqaro maydonda ajoyib oʻyin koʻrsatmoqda. Birinchi turda «Bryugge» maydonidan gʻalaba bilan qaytgan (3:2) birminghemliklar oʻz maydonida «Fenerbahche» darvozasiga javobsiz 6 ta gol urdi. Oʻyin taqdiri birinchi boʻlimda Manzambining tezkor goli va Nikolas Jeksonning dublidan keyinoq hal boʻldi. Ikkinchi boʻlimda esa Barkli ham dublga erishdi, zaxiradan tushgan Abraham hisobni yanada yirik koʻrinishga keltirdi. «Aston Villa» 100 foizlik natija bilan peshqadamlar safida.
«Portu» birinchi boʻlimda atigi bitta golli vaziyat yaratdi va darvozani ishgʻol qildi ham, ammo gol Borha Sayns hujum vaqtida qoʻl bilan oʻynagani uchun bekor qilindi. Mezbonlar esa ikkinchi boʻlim boshida haqli ravishda hisobni ochishdi: Abde jarima maydoni tashqarisidan toʻpni bir teginishda olis toʻqqizlikka aniq joylashtirdi. Bir necha daqiqa oʻtib Antoni «Portu» himoyasidagi qoʻpol xatodan foydalanib, ikkinchi golni urishi ham mumkin edi, ammo uning zarbasidan keyin toʻp ustunga bordi. Shundan keyin kutilmaganda «Portu» uygʻondi: avvaliga Veyga jarima zarbasidan hisobni tenglashtirdi, koʻp oʻtmay Agehovaning zarbasidan keyin toʻp toʻsin ostidan Vales qoʻriqlayotgan darvoza toʻriga borib tushdi. Ammo shu kuni kuchliroq boʻlgan mezbonlar uchun adolat qaror topdi: avvaliga Antonining uzatmasidan keyin Kucho hisobni tenglashtirdi. Keyin esa Isko penaltidan gʻalaba golini urdi – 3:2. «Betis» ikki oʻyinda 6 ochko toʻplagan holda yoʻqotishsiz davom etmoqda.
Oʻtgan turda darvozabon Nikita Xaykin jarohat olib, maydonni tark etgach, «Budyo-Glimt» «Bavariya»dan beshta gol oʻtkazib yuborgandi. Darvozabon Germaniyaning boshqa bir klubiga qarshi oʻyingacha safga qaytdi va oʻyin qahramoniga aylandi: toʻrt seyv ijro etib, WhoScored versiyasi boʻyicha eng yuqori ballni oldi (7,7).
«Borussiya» ustozi Niko Kovach esa asosiy hujumchisi Serji Girassini zaxirada qoldirgani uchun jazolandi. Ikkinchi boʻlimda uni maydonga tushirganida esa kech boʻlgandi: ikkinchi boʻlim boshida Syovold qanotdan oshirilgan uzatmadan foydalanib, yaqin burchakni aniq nishonga oldi.
Yozgi transferlar oynasi oxirida «Chelsi»dan olib kelingan darvozabon Italiya jamoasida ham qovun tushirishda davom etmoqda. Robert Sanches WhoScored versiyasi boʻyicha oʻyinning eng yomon futbolchisi boʻldi (5,4 ball). Ispaniyalik posbon avvaliga yaqin burchagidan ikki bor gol oʻtkazib yubordi, oʻyin oxirlarida esa avtogol muallifiga aylandi – ustundan qaytgan toʻp uning yelkasiga tekkan holda darvoza toʻriga borib tushdi. Qoʻshimcha daqiqalarda Duvikas hisobdagi farqni qisqartirdi, ammo «Komo»da kambek uchun vaqt qolmagandi.
«Shtutgart» saviyadagi farqni maydonda namoyish etdi va birinchi boʻlim oʻrtalaridan oʻtganda Shtiller Undavni qulay vaziyatga chiqarib yubordi, hujumchi himoyachining ortidan olis burchakka zarba berib, darvozabonni dogʻda qoldirdi. Mezbonlar gʻalabani oʻz tomoniga ogʻdirishi mumkin edi: avvaliga ofsayd, keyin esa qoʻl bilan oʻynalgani tufayli gollar bekor qilindi, yana bir zarba esa darvoza toʻsiniga bordi. Ikkinchi boʻlimda «Slovan» himoyachi oʻz jamoasi darvozasini ishgʻol etib qoʻygach, oʻyinda intriga tugadi. Soʻnggi daqiqada esa Demirovich hisobni yiriklashtirdi.
«Chelsi» bu mavsumda YeChLda ishtirok etmayotgan boʻlsa-da, klub fanatlari Chempionlar ligasiz qolmayapti: Ukrainaning «Shaxtyor» jamoasi yevromavsumni «Stemford Brij»da oʻtkazmoqda. Nominal mezbonlar shu kuni stadionga yigʻilgan muxlislarni kambek bilan xursand qildi. 28-daqiqada Mayer Piliosning yordami bilan hisobni ochgandi, ammo bir necha daqiqa oʻtib AEK penaltidan gol oʻtkazib yubordi. Oʻyin durangga qarab ketayotgandi, ammo «Shaxtyor» oʻyin oxirida qoʻshdi: 80- va 86-daqiqalarda ukrainlar jamoasi gʻalabani ilib ketdi.
