Bir necha ming namoyishchi Parijda "Milliy birlashuv" partiyasi parlament fraksiyasi rahbari, Fransiyada Yevropa parlamenti mablag‘larini talon-toroj qilgani uchun sudlangan Marin Le Pen ishtirokidagi mitingga qo‘shildi. Namoyishchilar o‘ta o‘ng siyosatchining 2027 yilda bo‘lib o‘tadigan Fransiya prezidentligi saylovlarida ishtirok etishini taqiqlovchi sud qaroriga qarshi norozilik bildirgan, deb xabar berdi dpa 6 aprel, yakshanba kuni.
Aksiya «Milliy birlashuv» tashabbusi bilan Nogironlar saroyi oldidagi maydonda bo‘lib o‘tdi. Tashkilotchilar namoyishda 10 ming kishi ishtirok etishini kutgandi. Bino oldidagi maydon to‘liq to‘lgani yo‘q, deb xabar berdi dpa.
«30 yil davomida men adolatsizlikka qarshi kurashdim. Va kurashishda davom etaman», — deya Le Pen so‘zlarini keltirgan AP. Uning ma’lumotlariga ko‘ra, aksiya qisman saylovoldi mitingi xarakteriga ega edi. Olomon bir necha bor shunday hayqirgan: «Marin — prezident!» va «Ular bizdan 2027 yilni o‘g‘irlay olmaydi».
Le Penning bir qancha tarafdorlari «Adolat buyruqlarni bajaryapti» va «Sud diktaturasini to‘xtating» degan plakatlarni ko‘tarib yurgan. Boshqa ishtirokchilar Je suis Marine ("Men - Marin") yozuvlari tushirilgan futbolkalarni kiyib, Le Penni sudlangan va shunga qaramay ikkinchi marta mamlakatning eng yuqori lavozimini egallashga muvaffaq bo‘lgan AQSh prezidenti Donald Trampga qiyoslashdi.
