O‘zbekiston, Qirg‘iziston va Tojikiston o‘rtasida "Farg‘ona vodiysining oltin sayyohlik halqasi" yaratiladi

Nashrda joriy yilning 31 mart kuni Xo‘jand shahrida bo‘lib o‘tgan O‘zbekiston, Qirg‘iziston, Tojikiston davlat rahbarlarining uch tomonlama sammiti doirasida "Navro‘z – mintaqadagi eng qadimiy madaniy-sayyohlik merosi" mavzusida mintaqaviy sayyohlik forum-muloqoti tashkil etilgani ta’kidlangan.

Qayd etilishicha, forumda O‘zbekiston qo‘shni davlatlar bilan madaniy, tarixiy, va tabiiy yodgorliklar xilma-xilligi bilan tanishish imkonini beruvchi yangi sayyohlik yo‘nalishini yaratish taklifini ilgari surgan.

"Jumladan, O‘zbekiston, Qirg‘iziston va Tojikistonning noyob tabiiy qo‘riqxona, tog‘ tizimi va ko‘llari, shuningdek, qadimiy shaharlari va boshqa diqqatga sazovor joylariga tashrif buyurishni o‘z ichiga olgan "Farg‘ona vodiysining oltin sayyohlik halqasi"ni yaratish masalasi ko‘rib chiqildi. Shuningdek, anjumanda mamlakatlarimizda o‘tkaziladigan bayram tadbirlarini birlashtiruvchi "Navro‘z – Markaziy Osiyo qalbida" deb nomlangan qo‘shma madaniy-sayyohlik yo‘nalishini tashkil etish masalasi ko‘rib chiqildi", – deyilgan nashrda.

24.kg maqolasida "Navro‘z qo‘shni mamlakatlar mushtarak tarixining ajralmas qismi, mintaqaning eng muhim sayyohlik va madaniy merosi sifatida Markaziy Osiyoda noyob hamda o‘ziga xos turizmni shakllantirishga asos bo‘lishi mumkin", – deb yozilgan.