«Andijon» Toshkentda tarixiy g‘alabaga erishdi: «sherlar» jamoasi mavsum startidagi besh o‘yindan to‘rttasida mag‘lubiyatga uchradi va turnir jadvalining ikkinchi qismida qolmoqda.
Foto: PFLFoto: PFL
11–13 aprel kunlari futbol bo‘yicha O‘zbekiston chempionatining 5–tur uchrashuvlari bo‘lib o‘tdi.
Superliganing 5-turidan o‘rin olgan dastlabki o‘yinda «Neftchi» Olmaliqda «Mash’al» bilan kuch sinashdi.
Tarkib va tajriba jihatdan ustunroq bo‘lgan farg‘onaliklar 4:1 hisobidagi yirik g‘alabasini nishonladi. Uchrashuvning 43-daqiqasida Jamshid Iskanderov burchak jarima zarbasini to‘g‘ridan to‘g‘ri golga aylantirdi.
Mag‘lubiyatsiz seriyasini davom ettirgan (2 g‘alaba va 3 durang) «Neftchi» 9 ochko bilan 4-o‘ringa ko‘tarildi. «Mash’al» 3 ochko bilan 15-o‘rinda bormoqda.
«Navbahor» esa guruh autsayderi ustidan ishonchli g‘alabaga erishdi. Namangandagi uchrashuvning har ikki bo‘limiga qo‘shib berilgan daqiqalarda bittadan gol urgan mezbonlar ochkolari sonini 8 taga yetkazib, turnir jadvalining 7-o‘rnida joylashgan. «Sho‘rtan» esa 1 ochko to‘plagan holda eng so‘nggi, 16-pog‘onani band etib turibdi.
O‘tgan mavsum yakunlariga ko‘ra, oliy ligaga ko‘tarilgan ikki jamoa o‘rtasidagi uchrashuv taqdirini Iqbol Malikjonovning birinchi bo‘limda olis masofadan urgan supergoli hal qildi.
Bu natijadan so‘ng qo‘qonliklar 6 ochko bilan 9-o‘ringa ko‘tarilib oldi. Xuddi shuncha ochkoga ega «Buxoro» esa 8-pog‘onani band etib turibdi.
«Dinamo» Samarqandda «So‘g‘diyona» bilan durang o‘ynadi – 1:1. Dastlab Ratinio uzoq masofadan supergol muallifiga aylandi. Tanaffusga yaqin Javohir Qahramonov «Dinamo» posbonini ranjitdi. Natijada Yagudinning 4 tur davom etgan quruq seriyasiga barham berildi.
Qatorasiga ikkinchi durangdan keyin Vadim Abramov jamoasi ochkolari sonini 9 taga yetkazdi va 6-o‘ringa tushib ketdi, «Co‘g‘diyona» 4 ochko bilan 11-pog‘onada qolmoqda.
Tur arafasida peshqadam bo‘lib turgan «Bunyodkor» Toshkentda «Qizilqum»ni yenga olmadi. 75-daqiqada mezbonlar hujumchisi Temirxo‘ja Abduxoliqov maydondan chetlatilgani o‘yin natijasiga ta’sir ko‘rsatmay qolmadi. O‘yinda har ikki jamoada ham qator vaziyatlar yaratilgan bo‘lsa-da, hisob ochilmadi - 0:0.
Natijada «Bunyodkor» 11 ochko bilan ikkinchi o‘ringa tushdi, «Qizilqum» 4 ochko bilan 12-o‘rinda qoldi.
O‘zbekiston chempionatining 5-turida «Xorazm» rasmiy mezbon sifatida Olmaliqda amaldagi mezbon OKMKga qarshi bahs yuritib, alamli mag‘lubiyatga uchradi.
Bellashuvning 37-daqiqadasi OKMK darvozasiga penalti belgilandi. Bosh hakam avvaliga to‘pni qo‘li bilan o‘ynagani uchun Islom To‘xtaxo‘jayevga qizil kartochka ham ko‘rsatgandi, ammo videotakrordan keyin bu qarorini o‘zgartirdi va kartochkani sariqqa o‘zgartirdi. Dilshod Jo‘rayev esa 11 metrdan xato zarba berib, sobiq jamoasi darvozasini ishg‘ol eta olmadi. 90+8-daqiqada esa Oybek Rustamov olmaliqliklar g‘alabasini ta’minlagan golni urdi.
Bu g‘alabadan keyin Mirjalol Qosimov jamoasi ochkolari sonini 13 taga yetkazib, peshqadamlikka qaytdi. «Xorazm» 6 ochko bilan 9-pog‘onada qoldi.
Turning markaziy bahsi Toshkentdagi JAR stadionida «Paxtakor» va «Andijon» o‘rtasida o‘tkazildi.
5 ta gol urilgan bellashuvda «burgutlar» O‘zbekistonning 15 karra chempioni ustidan tarixiy g‘alabani qo‘lga kiritishdi. Bungacha «Andijon» «sherlar»ni Toshkentda mag‘lub etmagandi.
Xomyakov jamoasi bu natijadan keyin 9 ochko bilan 4-o‘ringa ko‘tarildi. Mavsum startidagi 5 o‘yinda 4-mag‘lubiyatini qabul qilib olgan «Paxtakor» 3 ochko bilan 13-pog‘onada qolmoqda.
O‘yindan keyin Toshkent klubi muxlislari stadion atrofida portugaliyalik murabbiy Pedru Moreyraning iste’fosi so‘rab, aksiya o‘tkazishdi.
Turni «Nasaf» va «Surxon» o‘rtasidagi voha derbisi yopib berdi, Qarshida kechgan o‘yinda mezbonlar qiyin g‘alabaga erishdi.
Dragan Cheran birinchi bo‘lim oxirida hisobni ochgandi, ikkinchi bo‘lim davomida Oybek Bozorov qizil kartochka oldi va jamoadoshlarini qiyin ahvolga solib qo‘ydi. Lekin Ro‘ziqul Berdiyev shogirdlari yarim soat davomida kamchilik bo‘lib o‘ynab, g‘alabali hisobni saqlab qolishdi.
Endi amaldagi chempionlar ochkolari sonini 11 taga yetkazib, 2-o‘rindagi «Bunyodkor» bilan tenglashdi. 3 ochkosi bor Termiz klubi 14-pog‘onada qoldi.
