Yevroittifoq Qrim va Sevastopol uchun sanksiyalarni uzaytirdi

Yevropa Ittifoqi Rossiyaning Qrim yarimoroli va Sevastopol shahrini noqonuniy qo‘shib olishi munosabati bilan 2014 yil iyun oyida joriy qilgan sanksiyalarni yana bir yilga uzaytirdi. Bu haqda 16 iyun, dushanba kuni YeI kengashi ma’lum qildi.

Bryusselning eslatishicha, gap qo‘shib olingan Qrimdan Yevropa Ittifoqiga tovar va xizmatlar importini taqiqlash, yarimorol iqtisodiyotiga sarmoya kiritish, shuningdek, transport, telekommunikatsiya, energetika, neft va gaz sanoati uchun tovarlar va texnologiyalarni yetkazib berish haqida ketmoqda.

Yevropa Ittifoqi kengashi o‘zining press-relizida ta’kidlaganidek, 2022 yildan beri Rossiya Federatsiyasi Ukraina suvereniteti va hududiy yaxlitligini buzishda yanada ko‘proqqa borib, bu mamlakatga qarshi keng ko‘lamli urushni boshlab yubordi. «Yevropa Ittifoqi Ukrainaning xalqaro miqyosda tan olingan chegaralari doirasidagi mustaqilligi, suvereniteti va hududiy yaxlitligi hamda Rossiya agressiyasidan o‘zi himoya qilishning ajralmas huquqiga sodiq qoladi», — deyiladi matnda.

Rossiya Federatsiyasining Ukrainaga qarshi harbiy tajovuzi munosabati bilan Bryussel allaqachon Moskvaga qarshi 17 ta sanksiya paketini joriy qilgan. Ulardan oxirgisi Rossiya o‘z neftini eksport qilish uchun foydalanadigan «soyadagi flot»ning yana 200 ta kemasiga cheklovlarni o‘z ichiga oladi. Bundan tashqari, 75 ta yangi yuridik va jismoniy shaxslar Yevropa Ittifoqining sanksiyalar ro‘yxatiga kiritildi.

Bloomberg ma’lumotlariga ko‘ra, Yevropa Ittifoqining navbatdagi, 18-sanksiyalar paketi Rossiya moliya sektoriga qaratilgan. Xususan, yana 20 ta Rossiya bankining xalqaro SWIFT to‘lov tizimidan uzilishi muhokama qilinmoqda. Yana bir ehtimoliy qadam - Rossiya neftining narxi chegarasini bir barrel uchun 60 dollardan 30 dollargacha tushirish.