Toshkentdagi bog‘chada besh yoshli bola 2-qavatdan tushib ketdi

Toshkent shahri Maktabgacha va maktab ta’limi boshqarmasi Chilonzor tumanidagi bog‘chada 5 yoshli bola 2-qavatdan tushib ketgani aytilgan xabar yuzasidan izoh berdi.

Qayd etilishicha, holat 30 iyun kuni soat 9:45 atrofida 7-sonli davlat maktabgacha ta’lim tashkilotida ro‘y bergan. Tarbiyalanuvchi R.I. nazoratsizlik oqibatida ikkinchi qavat derazasidan yiqilib tushgan.

Bundan xabar topgan tashkilot hamshirasi tarbiyalanuvchiga birinchi tez tibbiy yordam ko‘rsatgan, so‘ngra bola 16-sonli shahar shifoxonasi bolalar bo‘limiga olib borilgan.

Shifokorlarning birlamchi tashxisiga ko‘ra, tarbiyalanuvchiga ikki qo‘l bilak sohasi sinishi, burun suyak sohasi sinishi, yuqori jag‘ kurak tishlarining aliyonlari osig‘ining sinishi tashxisi qo‘yilgan. Bolaning ahvoli og‘ir bo‘lgani sababli jonlashtirish bo‘limiga joylashtirilgan.

Boshqarmaga ko‘ra, uning ahvoli yaxshilanganidan so‘ng jonlantirish bo‘limidan chiqarilgan.

Ayni paytda holat bo‘yicha Chilonzor tuman IIO FMB xodimlari tomonidan tergovga qadar surishtiruv ishlari olib borilmoqda.