Erdo‘g‘an muxolifatning muddatidan oldin prezidentlik saylovi o‘tkazish talabini rad etdi

Turkiya prezidenti Rajab Toyyib Erdo‘g‘an mamlakatda prezidentlik va parlament saylovlari dastlab rejalashtirilganidek, 2028 yilda o‘tkazilishini aytdi.

Muxolifatning saylovlarni ushbu sanadan ertaroq o‘tkazish haqidagi chaqirig‘iga munosabat bildirar ekan, Erdo‘g‘an bunga hech qanday asos yo‘qligini ta’kidladi.

Turkiya muxolifatidagi Respublika Xalq partiyasi (CHP) yetakchisi O‘zg‘ur O‘zel joriy yilning noyabr oyida muddatidan oldin prezidentlik saylovini o‘tkazishga chaqirdi. Unga ko‘ra, hukmron «Adolat va taraqqiyot» partiyasi o‘zini «birinchi raqamli» siyosiy kuch deb hisoblasa, «saylov qutisidan» qo‘rqmasligi kerak.

«Konstitutsiya va saylov qonunchiligi o‘zgarmagani uchun 2028 yilda prezident va parlament saylovlari, 2029 yilda mahalliy saylovlar bo‘ladi, janob O‘zel. Taqvimdagi tasodifiy sanaga barmog‘ingizni bosib, saylovlar o‘tkazilishi kerak, deyish sizning orzungiz bo‘lishi mumkin, lekin xalqning bunday muammosi yo‘q. Millat uchun kun tartibida saylov yo‘q», dedi Erdo‘g‘an.

Rajab Toyyib Erdo‘g‘an 2014 yildan buyon Turkiya prezidenti. U uchinchi marta 2024 yil iyun oyida lavozimga kirishdi va 2028 yilgacha xizmat qiladi. Garchi mamlakat Konstitutsiyasi prezidentlik muddatini ikki davr bilan cheklagan bo‘lsa-da, Turkiya Adliya vazirligi Erdo‘g‘anning ikkinchi muddati hisobga olinmaydi, degan qarorga keldi. Chunki mamlakat 2018 yilda parlament boshqaruvidan prezidentlik shakliga o‘tgan.

Erdo‘g‘an may oyida yana bir muddatga saylanish niyati yo‘qligini aytdi.