Avstraliya 2014 yilda urib tushirilgan MH17 samolyoti uchun Rossiyadan tovon talab qildi

Avstraliya tashqi ishlar vaziri Penni Vong 10 iyul kuni Rossiyani Malaysia Airlines aviakompaniyasi MH17 reysi yo‘lovchilarining o‘limi uchun tovon to‘lashga chaqirdi. Bu bayonot Inson huquqlari bo‘yicha Yevropa sudi Moskvani aviahalokat uchun javobgar deb topganidan so‘ng yangradi.

«Biz Inson huquqlari bo‘yicha Yevropa sudining Rossiya MH17 reysining urib tushirilishi uchun javobgar ekanligi haqidagi qarorini olqishlaymiz», deb yozdi Vong ijtimoiy tarmoqda va buni «298 nafar qurbon va ularning yaqinlari uchun tarixiy lahza» deb atadi.

Vazirning eslatishicha, may oyida Xalqaro fuqaro aviatsiyasi tashkiloti (ICAO) kengashi ham xuddi shunday qaror qabul qilgan edi. Jumladan, Rossiya fojia uchun mas’ul ekani, Avstraliya va Niderlandiya bilan tovon to‘lash bo‘yicha muzokara boshlashi lozim, degan xulosaga keldi. Halokatda qurbon bo‘lganlarning 192 nafari Niderlandiya, 27 nafari Avstraliya fuqarolari edi.

«Biz yana bir bor Rossiyani o‘z mas’uliyatini bo‘yniga olishga va bu dahshatli harakat uchun tovon to‘lashga chaqiramiz», deb ta’kidladi Vong.

Malaysia Airlines aviakompaniyasining Amsterdamdan Kuala-Lumpurga uchayotgan Boeing samolyoti 2014 yil 17 iyul kuni Ukraina sharqida, separatistlar nazorati ostidagi hududda Rossiyada ishlab chiqarilgan Buk raketasi bilan urib tushirilgan edi. Barcha 298 nafar yo‘lovchi va ekipaj a’zolari halok bo‘ldi. Rossiya rasmiylari samolyot halokatiga aloqador ekanini rad qilib kelmoqda.

Niderlandiya sudi 2022 yil noyabrida o‘zini o‘zi e’lon qilgan DXR sobiq mudofaa vaziri Igor Strelkov va yana ikki kishini samolyotni qasddan yo‘q qilish va qasddan odam o‘ldirishda ayblab, sirtdan umrbod qamoq jazosiga hukm qildi. Ish bo‘yicha yana bir ayblanuvchi oqlandi.