Toshkentda kapotida baliqlar bilan kontent olgan haydovchi jarimaga tortildi

Toshkentda mashinasining old kapotiga himoya plyonkasini yopishtirgan holda, uning ichiga suv to‘ldirib, baliqlarni solgan va buni videoga olib, ijtimoiy tarmoqlarga tarqatgan fuqaro jarimaga tortildi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar berdi.

Video ijtimoiy tarmoq foydalanuvchilari orasida katta e’tiroz keltirib chiqardi. Holat Ekologiya vazirligi hamda Ichki ishlar vazirligi bilan hamkorlikda o‘rganilib, ushbu huquqbuzarlik Toshkent shahrida yashovchi fuqaro I.N. tomonidan sodir etilgani aniqlandi.

Huquqbuzarga nisbatan Ma’muriy javobgarlik to‘g‘risidagi kodeksning 111-moddasi 1-qismi (Hayvonlarga nisbatan shafqatsiz munosabatda bo‘lish) bilan ma’muriy bayonnoma rasmiylashtirildi va bazaviy hisoblash miqdorining 3 baravari – 1 million 125 ming so‘m miqdorida jarima belgilandi.

Ekologiya vazirligi tabiatdagi har qanday tirik jonzotlarga nisbatan nojo‘ya, o‘rinsiz, shafqatsiz munosabatda bo‘lish taqiqlangan va qonunchilikka muvofiq qat’iy javobgarlik belgilanganini eslatib o‘tdi.

Avvalroq Toshkent shahrida fuqaro uyida bir bosh Nil timsohini saqlab kelgani aniqlangan, jonivor hayvonot bog‘iga topshirilib, holat bo‘yicha hujjatlar sudga yuborilgan edi.