Mers YeI va AQSh savdo bitimini olqishladi

Vashington va Bryussel 27 iyul, yakshanba kuni kechqurun e’lon qilgan Yevropa Ittifoqi-AQSh savdo kelishuvi «transatlantik savdo aloqalarining keraksiz keskinlashuvidan» uzoqlashtiradi va Yevropa Ittifoqining birligi va mashaqqatli mehnati «o‘z samarasini berganini» ko‘rsatdi. Bu haqda Germaniya kansleri Fridrix Mers ma’lum qildi — uning so‘zlaridan kansler matbuot kotibiga tayanib, AFP agentligi iqtibos keltirmoqda.

Mersning so‘zlariga ko‘ra, kelishuv «Germaniyaning eksportga yo‘naltirilgan iqtisodiyotiga jiddiy zarba berishi mumkin bo‘lgan savdo mojarosining oldini olishga» imkon berdi. Bu, ayniqsa, avtomobil sanoati uchun to‘g‘ri keladi, bunda Tramp tomonidan ilgari joriy qilingan bojxona to‘lovlari deyarli ikki baravarga – 27,5 foizdan 15 foizgacha kamaytiriladi. Aynan shu sohada kelishuv «eng muhim ahamiyatga ega», dedi Mers.

Yevropaliklar o‘zlarining «asosiy manfaatlarini himoya qilishi mumkin edi, garchi men transatlantik savdoni yanada soddalashtirishni istardim», deb kansler so‘zlarini keltiradi AFP. «Barqaror va bashorat qilinadigan savdo munosabatlaridan har ikki tomon ham – Atlantikaning bu tomonida ham, boshqa tomonida ham biznes va iste’molchilar uchun bozorga kirish imkoniyatidan hamma manfaat ko‘radi», deb hisoblaydi nemis siyosatchisi.

AQSh prezidenti Donald Tramp va Yevrokomissiya rahbari Ursula fon der Lyayyen 27 iyul kuni kechqurun YeI va AQSh o‘rtasida savdo kelishuviga erishganini e’lon qildi. Bu Tramp aprel oyida AQShning boshqa ko‘plab iqtisodiy hamkorlari qatori Yevropa Ittifoqiga qarshi boshlagan savdo urushiga chek qo‘yishi kerak. Uning navbatdagi bosqichi 1 avgustdan boshlab, Yevropa Ittifoqidan AQShga import bojlari 30 foizga yetishi kutilgan edi.