Xorazmda mehnat staji «yasab beruvchi» mutaxassis ushlandi

U hech qayerda ishlamaydigan fuqarolarga ish haqi hisoblab, bu haqida ma’lumotnoma rasmiylashtirib berishini aytgan.

Foto: DXX

Xorazm viloyati, Gurlan tumanidagi «Soliq servis» davlat unitar korxonasi bosh mutaxassisi DXX tomonidan ushlandi.

Qayd qilinishicha, u o‘z mavqeidan foydalangan holda soliq idoralaridagi tanishlari orqali 2 nafar mahalliy fuqaroga muqaddam hech qayerda ishlamagan bo‘lsalar-da, 2025 yil yanvar oyidan iyun oyiga qadar bo‘lgan davrda ish haqi hisoblab, bu haqida ma’lumotnoma rasmiylashtirib berishini aytgan.

DXXning Xorazm viloyati bo‘yicha boshqarmasi tomonidan IJQK Departamenti hamkorligida o‘tkazilgan tezkor tadbirda mutaxassis o‘z xizmati evaziga 12 mln 500 ming so‘m olgan vaqtida ushlangan.

Unga nisbatan jinoyat ishi qo‘zg‘atilib, tergov harakati olib borilmoqda.