Londondagi “eng tor uy” sotuvga qo‘yildi

Londondagi “eng tor uy” 1 mln 195 ming funt-sterling yoki 1,6 mln dollar narxda sotuvga qo‘yildi, deya xabar berdi Britaniyaning Daily Star nashri.

Notting Hill Geytdagi ikki qavatli uyning kengligi 213 sm, umumiy maydoni 49 kvadrat metr bo‘lib, Kensington saroyidan bir necha qadam uzoqlikda joylashgan. Shu sababdan ham ikki yotoqxona, ikki hojatxona va terrasaga ega binoning narxi juda qimmat baholanyapti.

Ko‘chmas mulk taxminan 1930 yillarda qurilgan. Oradan 20 yil o‘tib, kosmetik ta’mirlangan hamda kirish qismiga maxsus ruhli soyabon, vitraj eshik va ajdaho boshi shaklidagi yomg‘ir oqizgich o‘rnatilgan.

Eshikdan kirgan joyda parket bilan qoplangan ochiq oshxona va ovqatlanish joyi mavjud. Shuningdek, birinchi qavatda dush, hojatxona va yotoqxonalardan biri joylashgan. Ikkinchi qavatda yozgi terrasa va qabulxona bor. Eng yuqori qavatda esa keng oynali ikkinchi yotoqxona va katta vannaxona mavjud.

Uyni sotayotgan Unique Property Company boshqaruvchisi Saymon Stoun ko‘chmas mulkni Londonda topish imkonsiz bo‘lgan maskan, deya ta’rifladi. Uning ta’kidlashicha, uyning ichki kengligi London metrosi vagonlaridan ham torroq bo‘lsa-da, yashash uchun juda qulay.