Aydyn Rahimbayev “Do‘stlik” ordeni bilan mukofotlandi

27 avgust kuni prezident Shavkat Mirziyoyevning farmoni bilan BI Group xalqaro xoldingining bosh ijrochi direktori (CEO) Aydyn Rahimbayev yuksak davlat mukofotlaridan biri — “Do‘stlik” ordeni bilan taqdirlandi.

Davlat mukofoti O‘zbekiston hududida investitsion, infratuzilma va ijtimoiy loyihalarni amalga oshirishga qo‘shgan katta hissasi uchun topshirildi. Taqdirlash marosimi O‘zbekiston Respublikasi Vazirlar Mahkamasi binosida bo‘lib o‘tdi. Mukofotni prezident nomidan bosh vazir o‘rinbosari Xo‘jayev Jamshid Abduxakimovich topshirdi.

So‘nggi besh yil ichida xolding O‘zbekiston qurilish sohasining yetakchi kompaniyalaridan biri va ishonchli xalqaro hamkor sifatida o‘z mavqeini mustahkamladi. U turar joy majmualaridan tortib, infratuzilma va ijtimoiy yo‘nalishdagi murakkab loyihalargacha amalga oshirishga qodirligini ko‘rsatdi.

BI Group — qurilish va investitsiya sohasida 30 yillik tajribaga ega xalqaro developerlik xoldingi. Xolding AQSh, BAA va O‘zbekistonni ham o‘z ichiga olgan sakkizta davlatda faoliyat yuritadi. Foydalanishga topshirilgan ko‘chmas mulkning umumiy maydoni 8,5 mln m²ni tashkil etadi va 500 mingdan ortiq kishi kompaniya qurgan obektlarda istiqomat qiladi. BI Group AIX va KASE birjalari listingiga kiritilgan hamda xalqaro ENR Top-250 Global Contractors reytingiga kiradi. Xolding turar joy va tijorat obektlarini qurish, shuningdek, infratuzilma va muhandislik loyihalarini amalga oshirishga ixtisoslashgan.