Germaniyada ishsizlar soni uch milliondan oshdi

Germaniyada ishsizlik soni so‘nggi o‘n yillikda ilk marta 3 milliondan oshdi. Mehnat birjasi 29 avgust kuni bergan ma’lumotga ko‘ra, mavsumiy o‘zgarishlarni hisobga olmagan holda umumiy ishsizlar soni 3,02 million kishini tashkil etmoqda, bu – o‘tgan oydagidan 46 mingga ko‘p.

“Ishsizlikning oshishi kutilmagan holat emas. Shunga qaramay, raqamlar o‘sish va bandlikni ta’minlash uchun islohotlar qanchalik kerakligini ko‘rsatyapti”, – deya munosabat bildirdi kansler Fridrix Mers.

Ishchi kuchiga talab sekinlashyapti. Avgust oyida vakant o‘rinlar soni 631 mingta edi, bu bir yil oldingidan 68 mingtaga kam.

Germaniya mehnat vaziri Berbel Basning so‘zlariga ko‘ra, global iqtisodiy noaniqlik va Rossiya Ukrainada boshlagan urushning ta’sirlari hamon davom etmoqda. U hukumat ko‘rayotgan choralar qatorida fiskal qoidalar yumshatilib, 500 mlrd yevrolik infratuzilma jamg‘armasi yaratilganini aytdi.

Bunday katta sarmoya iqtisodiyotni rag‘batlantirishi ko‘zda tutilgan, lekin iqtisodchilarga ko‘ra, bu choraning samarasi to‘liq amalda ko‘rinishiga bir necha yil vaqt kerak. Mutaxassislar Yevropaning eng yirik iqtisodiyotidagi chuqur ildizlarga ega muammolar yechimi uchun tarkibiy islohotlar zarurligini aytmoqda.

“3 million kishining ishsizligi – oxirgi yillarda islohotlar zarurligi inkor qilib kelinganini ko‘rsatuvchi ayblov xulosasi demakdir. Germaniya haqiqiy “islohotlar kuzi”ga muhtoj”, – dedi BDA ish beruvchilar assotsiatsiyasi prezidenti Reyner Dulger.

Ko‘plab oilalar kelajakdan xavotirlanib, mablag‘larni imkon qadar tejab ishlatishga harakat qilyapti. Buning natijasida iyul oyida chakana savdo kutilganidan ko‘ra kuchliroq pasaydi, bu esa uchinchi chorakda iste’mol kayfiyati yanada pasayishi mumkinligini ko‘rsatadi.