Mustaqillikning 34 yilligi munosabati bilan Shavkat Mirziyoyev ilm-fan, adabiyot, madaniyat va san’at sohalarini rivojlantirishga hissa qo‘shgan bir guruh marhum olim va ijodkorlarni mukofotladi. O‘zbekistonda xizmat ko‘rsatgan artist Oxunjon Madaliyev ham “Mehnat shuhrati” ordeni bilan taqdirlandi. Kun.uz muxbiri Oltiariq tumanidagi Yangiarab qishlog‘ida – xonanda yashagan xonadonda bo‘lib, marhum qo‘shiqchining yaqinlari bilan suhbatlashdi.
“Mustaqilligimizning 34 yilligi munosabati bilan bayram arafasida otamga “Mehnat shuhrati” ordeni berildi. Qarangki, o‘tganlariga 25 yil bo‘lgan bo‘lsa-da, hali-hanuz otamning qilgan mehnatlari, xizmatlari el-yurtimizning va prezidentimizning eslaridan chiqmagani bizni judayam quvontirdi.
Bu katta e’tirof, katta e’tibor. Bu haqida o‘zimning Instagram sahifamga qo‘yganimda minglab odamlar xursand bo‘lib, o‘z fikrlarini yozishdi, yurtboshimizga rahmat aytishdi. Albatta, bu nafaqat bizning oilamiz, balki qishlog‘imiz, tumanimiz, viloyatimiz va butun O‘zbekistonimizdagi san’atsevar xalqimizni ham xursand qildi.
Oxunjon Madaliyev onasi bilan
Men ham qo‘shiq aytishni boshlaganimga 20 yil bo‘lgan bo‘lsa, lekin hali otamning hamma qo‘shiqlarini aytib ulgurganim yo‘q. Judayam ko‘p qo‘shiqlar yaratishgan. Judayam sermazmun, barakali ijod qilishganini endi-endi tushunib yetyapman-da. Judayam ko‘p qo‘shiqlari bor. Otamning qo‘shiqlari so‘ralmagan kunning o‘zi yo‘q. Deyarli har kuni so‘raladi. Umuman olganda, o‘zimning qo‘shiqlarimdan ko‘ra baribir ko‘proq qayerga borsam, otamning qo‘shiqlarini aytaman.
Qilichbek Madaliyev onasiHabibaxon Madaliyeva bilan
Otam onalarini, ya’ni buvimni judayam yaxshi ko‘rganlar. Avval eski hovlimizda birga yashaganmiz. Keyinchalik yangi hovliga alohida bo‘lib ko‘chib chiqqanimizdan keyin, aynan buvim uchun alohida xonalar solishgan, sharoitlar qilingan. Har kuni otam ertalab to‘yga ketayotganlarida, albatta, buvimning oldilariga tushib, birga nonushta qilib, duolarini olib, keyin to‘yga ketardilar.
Mavzuga oid
To‘ydan kech kelsalar ham, onamdan so‘rarkanlar: “Buvimga obed jo‘natdingizmi, kechki ovqat jo‘natdingizmi?” deb. Lekin yerda ham buvim o‘zlari yolg‘iz bo‘lmaganlar. Amakim oilalari bilan u yoqda qolganlar. Baribir bu yerda qilingan ovqatdan ham, albatta, buvimga yuborish kerak bo‘lgan-da, shunaqa odat bo‘lgan. Hech shu narsalar esdan chiqmasdi. Judayam yaxshi ko‘rganlar. Sababi buvim rahmatli ham o‘zlari ko‘p intervyularda aytgan: “juda qiynalib katta qilganman”, deb. Ular oddiy qishloqning oddiy odamlari bo‘lishgan. U paytda dalalarga chiqib mehnat qilishgan. Qolaversa, otam o‘zi kenja farzand bo‘lganlar-da. Shuning uchun ham buvim ham otamni judayam yaxshi ko‘rganlar.
Men o‘ylaymanki, qiyinchilik bilan katta qilganlarini otam yurak-yuraklaridan his qilganliklari uchun hammi. Men eslayman bu narsani aniq. Buvim nima desalar, aytgan narsalari joyida bo‘lardi. Juda ko‘ngillariga qattiq qarardilar. Hech qachon xafa bo‘lmasin, nimadir zaruriyat bo‘lib qolmasin deb, har doim mana shu e’tiborda turardilar. Mana shu uylarimiz qurilishida ham hali ustalar ishlayotgan paytdayoq: “buvi, yuring, bir sizga yangi uyimizni ko‘rsatib kelay. Faloncha o‘zgarish bo‘ldi”, deb, ya’ni haligi imorat bitishni boshlaganda nimadirlar ko‘zga ko‘rinishni boshlaydi-yu baribir. O‘zlari olib chiqib, aylantirib, ko‘rsatardilar, “mana, bu yerda mana bunaqa xona qilaman, mana bu yerda mana bunaqa qilaman, mana bu uy sizga”, deb. Men tug‘ilgan hovli, u bu taraflar endi o‘sha paytda dasht deyilgan. Biz eski hovlimizning past tarafida borganmiz.
O‘sha pastki hovlimiz deymiz. Eski pastki hovlimizda tug‘ilganman. O‘sha yerda yashaganmiz. Otamning akalari bor edi, rahmatli bo‘ldilar. Amakim bilan o‘sha biz turgan hovli yonma-yon bo‘lgan. Amakim ham keyin bu yoqqa o‘tdilar. Buvim o‘sha hovlida qoldilar. Bu yoqqa kelishni xohlamadilar. Sababi endi haligi buvamiz ham rahmatli bo‘lib ketgan edilar. O‘shaning uchun otamga aytarkanlar-da: “yo‘q, men u yoqqa chiqmayman. Otangning ruhlari mana shu yerga keladi. Mana shu yerning chirog‘ini yoqib o‘tiraman, mana shu uyim mening. Shu yerda o‘tiraman”, deb. Lekin aytyapman-ku, har kuni ertalab otam, albatta, u hovliga tushardilar. Nonushta u yoqda bo‘lardi.
Agar vaqtlari bo‘lsa, umuman olganda ovqatlanadigan imkoniyat bo‘ladigan bo‘lsa, biz eski hovlimizga tushardik. Yoki buvim bu yoqqa olib chiqilardi. Imkon topsalar otam buvim bilan birga dasturxon ustida o‘tirishni ma’qul topardilar. Biz shuni ko‘rib o‘rganganmiz. Otamdek inson bo‘lish qiyin. Bag‘rikenglik, mehridaryolik, har kimda ham bo‘lavermaydi bunaqasi”, deydi Oxunjon Madaliyevning o‘g‘li Qilichbek Madaliyev.
Habibaxon Madaliyeva, Oxunjon Madaliyevning turmush o‘rtog‘i
“Prezidentimiz mukofotni berganidan, avvalambor, juda ham xursandmiz. Nafaqat oilamiz, butun O‘zbekiston Respublikasidagi Oxun akaning muxlislari juda katta xursandchilik bilan qarshi olishdi. Hozirgacha mana, telefon orqali hammalari bizni tabriklashyapti. Mana shu Oxun akamning qilgan mehnatlarini shunday darajaga ko‘tarib, shunday ordenlarni berganiga Allohga hamdu sanolar bo‘lsin.
Oxunjon Madaliyev Muhriddin Holiqov bilan
Turmush o‘rtog‘im “ona-o‘g‘il” ramzi bo‘lgan. Unda yosh edim, bolalarim kichkina edi. Torlarini ko‘tarib, xizmatga chiqib ketishar edi har kuni, onamning duosini olib, unda onamiz bilan birga yashardik. Turmush o‘rtog‘im onamni, ya’ni qaynonamni birinchi o‘rinda ko‘rgan, nihoyatda hurmatini joyiga qo‘ygan. Gastrolga ketishsa ham, 10 kun, 15 kunga onamdan xabar olib turing, men sizga ishonaman deb topshirib ketar edi. Onaning hurmatini joyiga qo‘yganini endi men boshqa joyda ko‘rmaganman-u, lekin oilada shuning guvohi bo‘ldim, ko‘rdim.
Xizmatga ketadimi, shoshilib turadimi, xalq xizmatda kutib tursa ham, birinchi o‘rinda onamning duosini olib, keyin xizmatga chiqib ketishar edi. Kelganlarida ham onamning oldiga tushib, uyqusida bo‘lsa ham ko‘rib, yuzlarini silab, duolarini olib keyin uyga kirar edi. Nihoyatda onam bebaho ona edi, dilbar ona edi.
Onam 42 yoshida ekanida Oxunjon akam tug‘ilgan ekan. Komiljon Otaniyozov, Olmaxon Hayitovaning qo‘shiqlarini eshitganda, shularning xizmatini qilsam deb niyat qilgan ekan. Tug‘ma iste’dod bor edi-da Oxun akada. Unaqa inson dunyoga 100 yilda bir marta keladi. Insonparvar, ko‘ngli ochiq, katta-yu kichikka bir xil hurmat-izzatda bo‘lib, hammani bir xil ko‘rar edi. Mahalladagi katta-kichiklarga bir xil hurmat-izzatda bo‘lishgan.
Oxun akam, onam borligida uyimiz qandaydir fayzli edi. Uyimizda kechgacha mehmon bo‘lardi. Unda yosh kelin edim, ularga xizmat qilib, ovqatlarini qo‘yib, baribir o‘shalarni ko‘rib o‘zim quvonib, charchaganimni ham bilmasdim. Dasturxonimiz doim kechgacha ochiq turar edi. Qo‘ni-qo‘shnilar chiqmasa chaqirishar edi. Onam juda odamni yaxshi ko‘rar edi. Odamlar bilan birga o‘tirib, maza qilib, xursand bo‘lib, suhbatlashib o‘tirishni yaxshi ko‘rar edi. Uyda hech kim bo‘lmasa zerikib qolar edi”, deydi Oxunjon Madaliyevning turmush o‘rtog‘i Habibaxon Madaliyeva.
Oxunjon Madaliyev Nusratovich 1963 yil 21 mayda Farg‘ona viloyati Oltiariq tumani Yangiarab qishlog‘ida duradgor Usta Nusrat oilasida dunyoga kelgan.
1980 yilda o‘rta maktabni tamomlab, 1981 yilda hujjatlarini Farg‘ona davlat pedagogika institutining musiqa fakultetiga topshirgan.
1985 yilda institutni muvaffaqiyatli tamomlab, yo‘llanma bilan Oltiariq tumanidagi 26-sonli o‘rta maktabda musiqa fani o‘qituvchisi bo‘lib ishladi.
Keyinchalik Hunar texnika bilim yurtida, bir oz vaqt o‘tib, Farg‘ona Davlat filarmoniyasida yakkaxon solist sifatida faoliyat yuritgan.
1989 yili Toshkent shahrida “Kamolot 89” ko‘rik tanlovida g‘olib bo‘lib, shu yilning dekabr oyida Xalqlar do‘stligi saroyida ilk yakkaxon konsert dasturini taqdim etgan. Keyinchalik xonanda Tojikiston, Qirg‘iziston, Qozog‘iston va Turkmaniston Respublikalarida konsert bergan.
Qo‘shiqchilik san’atiga qo‘shgan munosib hissasi uchun Oxunjon Madaliyev 1997 yil 26 avgustda O‘zbekiston Respublikasi prezidenti tomonidan “Shuhrat” medali bilan taqdirlangan.
1999 yil 25 avgustda “O‘zbekistonda xizmat ko‘rsatgan artist” unvoniga sazovor bo‘lgan.
2025 yilda “Mehnat shuhrati” ordeni bilan taqdirlangan.
Ko‘rsatuvning to‘liq qismini Kun.uz'ning YouTube sahifasida to‘liq tomosha qilishingiz mumkin.
