To‘qayev O‘zbekistonga tashrif buyuradi

Qozog‘iston rahbari xalqqa murojaatida yaqin istiqboldagi ish rejalari haqida ma’lumot berdi.

Prezident Qosim-Jo‘mart To‘qayev bir qator davlatlarga tashrif buyurishi, shuningdek, Nyu-Yorkda BMT Bosh Assambleyasining yubiley sessiyasida nutq so‘zlashi haqida aytdi, deb xabar berdi Tengrinews.

Xalqqa murojaat qilgan prezident yaqin istiqboldagi ish rejalari haqida ma’lumot berdi.

«Yil oxirida mening Rossiya, O‘zbekistonga tashriflarim bo‘lib o‘tadi, Ozarboyjon, Armaniston, Turkmaniston rahbarlarini Ostonada qabul qilishga tayyorgarlik ko‘rmoqdamiz, Osiyo va Yevropaning bir qator davlatlari rahbarlari bilan uchrashuv va muzokaralar rejalashtirilgan», dedi Qosim-Jo‘mart To‘qayev.

Shuningdek, prezident BMT minbarida nutq qilishini aytdi.

«Tez orada Nyu-Yorkda bo‘lib o‘tadigan Bosh Assambleyaning yubiley sessiyasida nutq so‘zlashni rejalashtirmoqdaman, u yerda Qozog‘istonning xalqaro vaziyatga qarashini, jumladan, Birlashgan Millatlar Tashkilotini isloh qilish bo‘yicha takliflarini taqdim etaman», deb qo‘shimcha qildi davlat rahbari.