Poytaxtdagi arzonlashtirilgan yarmarkalarda kameralar bozor ma’muriyati hisobidan o‘rnatilyapti

Yaqinda Toshkent shahar bozorlaridagi arzonlashtirilgan yarmarkalarning barchasida kuzatuv kameralari o‘rnatilayotgani xabar qilingandi. Poytaxt hokimligi buni rastalarda belgilab qo‘yilgan narxdan qimmatga sotish holatlariga qarshi kurashish maqsadi bilan izohlagandi.

Kun.uz kameralar kimning hisobidan qo‘yilyotgani, uning nazorati va mahsulotlar qimmat sotiladigan bo‘lsa, kim qanday tartibda chora ko‘rishi haqida shahar hokimiyatiga savollar yuborgandi.

Hokimlik munitsipal aktivlarni boshqarish boshqarmasining bergan ma’lumotiga ko‘ra, joylardagi dehqon bozorlarida tashkil etilgan savdo yarmarkalariga o‘rnatilayotgan kameralar bozorlarning (aksiyadorlik jamiyat yoki mas’uliyati cheklangan jamiyat) hisobidan, o‘z imkoniyatlaridan kelib chiqqan holda o‘rnatilmoqda.      

Ularni nazorat qilish bozorlarning mas’ul xodimlariga yuklatilishi, shuningdek jamiyat rahbarining shaxsiy nazoratida bo‘lishi qayd etildi.        

Ta’kidlanishicha, agarda sotuvchi xaridorga mahsulotni belgilangan narxdan qimmat sotishi aniqlansa, bozor ma’muriyati tomonidan yarmarka savdosidan chetlashtiriladi.

Eslatib o‘tamiz, bu tashabbus hokimlik va prokuratura departamenti tomonidan iste’mol mahsulotlarini arzonlashtirilgan narxlarda taqdim etish maqsadida ilgari surilgani aytilgandi. 

Hozirda Mirobod dehqon bozori va Eski Juva (Chorsu) bozorida kuzatuv kameralarini o‘rnatish ishlari yakunlangan.

Bu boradagi ishlar davom etmoqda va tez orada poytaxtning barcha yirik bozorlaridagi arzonlashtirilgan mahsulotlar yarmarkalarida kuzatuv kameralari o‘rnatiladi.