Ta’lim sifatini ta’minlash milliy agentligining vazifalari belgilandi

Hujjat prezidentning "Ta’lim sifatini ta’minlash va ta’lim xizmatlari ko‘rsatish tizimini takomillashtirish bo‘yicha qo‘shimcha chora-tadbirlar to‘g‘risida"gi farmoniga muvofiq ishlab chiqildi.

O‘zbekiston prezidenti administratsiyasi huzuridagi Ta’lim sifatini ta’minlash milliy agentligi "Ta’lim sohasidagi loyihalar markazi" loyiha ofisi negizida yaratildi. U o‘rta maxsus, kasbiy, oliy va oliy ta’limdan keyingi ta’lim, shuningdek kadrlarni qayta tayyorlash va ularning malakasini oshirish, malakalarni baholash sohalarida tashqi sifat nazoratini amalga oshiruvchi maxsus vakolatli davlat organi hisoblanadi.

Hujjat bilan Ta’lim sifatini ta’minlash milliy agentligi to‘g‘risidagi nizom tasdiqlandi. U agentlikning maqomi, vazifa va funksiyalari, vakolatlari, huquq va majburiyatlari, shuningdek faoliyatini tashkil etish tartibini belgilaydi.

Agentlikning asosiy vazifalari:

ta’lim tashkilotlarida ichki sifat nazorati mezonlari va tartib-taomillarini takomillashtirish va samarali amalga oshirish bo‘yicha uslubiy tavsiyalar berish;
ta’lim tashkilotlarida ta’lim sifatini ta’minlashga qaratilgan choralar samaradorligini o‘rganish bo‘yicha ilmiy va amaliy tadqiqotlarni olib borish, shuningdek so‘rovlar o‘tkazish.
 
Agentlik tuzilmasiga agentlikning markaziy apparati va Milliy malaka tizimini rivojlantirish instituti kiradi.