Xitoy aviakompaniyasi dunyodagi eng uzun to‘g‘ridan to‘g‘ri reysni yo‘lga qo‘yadi

Marshrut uzunligi 19 631 kilometrni tashkil etadi, bir tomonlama parvoz vaqti 24 soatdan ortiq: Shanhaydan taxminan 25 soat-u 30 daqiqa va ortga deyarli 29 soat.

Parvozlar Boeing 777-300ER samolyotlarida amalga oshiriladi, texnik to‘xtash Oklendda bo‘ladi. Yo‘lovchilar tranzit hududni tark etishi yoki reyslarni o‘zgartirishi shart emas. Chiptalar narxi hayratlanarli: ekonom-klassda 1718 dollardan va biznes-klassda 6 435 dollardan boshlanadi. Parvoz haftada ikki marta amalga oshiriladi: Shanhaydan dushanba va payshanba kunlari, Buenos-Ayresdan seshanba va juma kunlari.

Taqqoslash uchun, to‘xtovsiz parvozlar bo‘yicha joriy rekord Singapur-Nyu-York yo‘nalishi bo‘yicha Singapore Airlines kompaniyasiga tegishli. Masofa 17 662 kilometrni tashkil etadi, faqat biznes va premium-ekonom-klassga ega maxsus modifikatsiyalangan Airbus A350-900ULR samolyotida parvoz vaqti deyarli 19 soatni tashkil qiladi. Air China ekonom-klassdagi eng uzoq parvoz bo‘yicha rekordga ega: Pekindan San-Pauluga Madridda to‘xtash bilan, 17 583 kilometr masofa.

China Eastern Airlines aviakompaniyasining yangi yo‘nalishi nafaqat davomiylik bo‘yicha rekord o‘rnatadi, balki Xitoyning Janubiy Amerika bilan transport va diplomatik hamkorligi ortib borayotganini ham ta’kidlaydi. Mutaxassislarning ta’kidlashicha, bunday uzoq parvozga talab mo‘’tadil bo‘lib qolishi mumkin, ammo yo‘nalish allaqachon mintaqalar o‘rtasidagi aloqalarni mustahkamlash strategiyasining muhim qismi sifatida ko‘rilmoqda.