Otabek Shukurov faoliyatini BAA klubida davom ettiradi

«Baniyas» O‘zbekiston milliy jamoasi a’zosi bilan shartnoma imzolaganini e’lon qildi.

Foto: FC Baniyas

O‘zbekiston milliy terma jamoasining yetakchi futbolchilaridan biri Otabek Shukurov faoliyatini Birlashgan Arab Amirliklarining «Baniyas» klubida davom ettiradi. Futbolchi erkin agent maqomida yangi jamoasi safiga qo‘shildi. Uning «Baniyas» bilan imzolagan shartnomasi shartlari haqida ma’lumot berilmadi.

So‘nggi haftalarda 29 yoshli yarimhimoyachining nomi bir qator BAA jamoalari bilan bog‘langan edi. Muzokaralar yakunida Shukurov «Baniyas» klubini tanladi. U o‘tgan mavsumni Saudiya Arabistonining «Al-Fayha» klubida o‘tkazgan.

Otabek Shukurov futbolchilik faoliyatini 2014 yilda Muborakning «Mash’al» klubida boshlagan. Keyinchalik «Bunyodkor», «Buxoro», «Sharja» (BAA), «Fotih Qoragumruk» (Turkiya), «Qaysarispor» (Turkiya), «Al-Fayha» (Saudiya Arabistoni) klublarida o‘ynagan.

O‘zbekiston milliy jamoasi tarkibida 79 o‘yinda maydonga tushib, 9 ta gol urgan.

Futbolchilarning shartnomalarini kuzatib borishga ixtisoslashgan Transfermarkt portali Otabek Shukurovning transfer qiymatini 1,8 mln yevroga baholagan.