PACE Rossiya demokratik kuchlari bilan muloqot uchun platforma yaratmoqchi

1 oktyabr, chorshanba kuni Yevropa kengashi parlament assambleyasi (YeKPA, PACE) Rossiya demokratik kuchlari bilan muloqot uchun platforma yaratishga qaror qildi. Ushbu platforma assambleya va Rossiya muxolifati uchun fikr almashish va «o‘zaro manfaatli masalalarni hal qilish» uchun forum bo‘lib xizmat qilishi ko‘zda tutilgan.

Platformaga YeKPA rahbari raislik qiladi. Uning ishtirokchilariga ma’lum huquqlar beriladi: ular qo‘mita va quyi qo‘mita yig‘ilishlarida, shuningdek, YeKPA sessiyalarida o‘tkaziladigan tadbirlarda qatnashishi va raisning ruxsati bilan ularda nutq so‘zlashi mumkin bo‘ladi.

YeKPAning 80 nafar a’zosi ushbu platformani yaratishni tartibga soluvchi «Rossiya demokratik kuchlari» rezolyutsiyasini yoqlab chiqdi, to‘rt nafari betaraf qoldi. Ovoz berish YeKPAning Strasburgdagi yalpi sessiyasida bo‘lib o‘tdi.

2022 yilning mart oyida Rossiya Ukrainaga qarshi urushi tufayli Yevropa kengashidan chiqarib yuborilganiga qaramay, Yevropa kengashi a’zolarining fikricha, Rossiyadan kelgan muxolif siyosatchilar va faollarning tashkilot rahbariyati va assambleya a’zolari bilan to‘g‘ridan to‘g‘ri muloqot qilishi uchun bir qator jiddiy sabablar bor.