1 noyabrdan boshlab avtomobilga gazballon o‘rnatilganidan keyin texpasport almashtirilmaydi

1 noyabrdan boshlab avtomobilga gazballoni o‘rnatilganda texpasportni almashtirish shart bo‘lmaydi. Ichki ishlar vazirligi xabariga ko‘ra, bu – 16 sentabr kuni imzolangan prezident qarorida belgilangan.

Qarorga ko‘ra, 2025 yil 1 noyabrdan e’tiboran transport vositasiga gazballoni o‘rnatilganiga oid ma’lumotlarni elektron shaklda yuritish orqali transport vositasini ro‘yxatdan o‘tkazish guvohnomasini qayta rasmiylashtirish tartibi bekor qilinadi.

Eslatib o‘tamiz, o‘tgan hafta gaz quyish shoxobchalarida UGaz tizimi ishga tushirilgani xabar qilingandi. Bu tizim avtomobil gaz quyish shoxobchasiga kirganda uning texnik ko‘rikdan o‘tganini avtomatik tarzda tekshiradi va agar texnik ko‘rik muddati tugagan bo‘lsa, operatorga xabar beriladi.

Shuningdek, agar yoqilg‘i turi mos kelmasa yoki ballon ro‘yxatdan o‘tkazilmagan bo‘lsa, tizim bu haqda ham operatorni shu joyning o‘zida ogohlantiradi.

Bundan tashqari, shu yil avgust oyida avtomobilga gazballon o‘rnatish uchun ruxsatnomani olish osonlashgani ma’lum qilingan. Endi faqatgina my.gov.uz portali orqali onlayn ariza yuborish kifoya: qolgan ishlarni YHXX xodimlari amalga oshiradi. Ariza 10 kun ichida ko‘rib chiqilib, natijasi shaxsiy kabinetga yuboriladi. Xizmat narxi – 0,3 BHM (123 600 so‘m).