Navoiyda 104 mlrd so‘mlik noqonuniy kriptovaluta savdosi bilan shug‘ullangan shaxslar qo‘lga olindi

Navoiy viloyatida noqonuniy ravishda 104 mlrd so‘mlik kriptovaluta savdosi bilan shug‘ullangan to‘rt nafar fuqaro qo‘lga olindi. Bu haqda IIV Tezkor-qidiruv departamenti Kiberxavfsizlik markazi xabar berdi.

Ma’lum qilinishicha, holat Operativ-qidiruv departamenti, Kiberxavfsizlik markazi, Davlat xavfsizlik xizmati hamda Milliy istiqbolli loyihalar agentligi xodimlari tomonidan o‘tkazilgan tekshiruvda aniqlangan. Tadbir “Xavfsiz kibermakon” va “Dolzarb 20 kun” aksiyalari doirasida o‘tkazilgan.

Tezkor tadbir davomida noqonuniy kripto aylanmasi bilan shug‘ullangan 35, 32, 27 va 26 yoshli shaxslar qo‘lga olingan. Ular One Paymens va P2P Trade ilovalari orqali o‘zga shaxslarga tegishli bank kartalarini ulab, kriptovalutani pulga ayirboshlagan.

Shuningdek, tezkor tadbirda 68 ta plastik karta, 12 ta uyali aloqa vositasi, 8 ta SIM karta va 2 ta kompyuter rasmiylashtirib olingan. Hozirda holat yuzasidan tergovga qadar tekshiruv harakatlari olib borilmoqda.