Ronaldu – tarixdagi ilk milliarder futbolchi bo‘ldi

Krishtianu Ronaldu tarixdagi birinchi milliarder futbolchiga aylandi. Amerikaning Bloomberg kompaniyasi uning boyligini 1,4 milliard dollarga baholagan. U ko‘p vaqt davomida reklama va shaxsiy brendlari orqali millionlab mablag‘ ishlab topgan, ammo aynan «An-Nasr» bilan shartnomasi unga milliardlik dovondan o‘tish imkonini berdi.

40 yoshli hujumchi joriy yil yozida Saudiya Arabistoni klubi bilan shartnomasini yana ikki yilga uzaytirgandi. Manba ma’lumotiga ko‘ra, kelishuv qiymati 400 million dollarga teng. Krishtianu yiliga 200 million dollarlik maosh oladi, kelishuvni imzolashga rozilik bergani uchun yana 30 million dollarlik bonus oladi. Shuningdek, Ronaldu klubda 15 foizlik ulushga ega.

Bloomberg hisob-kitoblariga ko‘ra, 2002 yildan 2023 yilga qadar Ronaldu «Manchester Yunayted», «Real» va «Yuventus» kabi grand klublar bilan shartnomalari orqali 550 million dollardan ortiq mablag‘ ishlab topgan – bu faqat maoshlarni o‘z ichiga oladi, reklamalar hisobda emas. U Armani va Castrol kabi brendlar bilan shartnoma kelishuvlariga ega, Nike bilan o‘n yillik shartnomasi esa unga yiliga 18 million dollardan daromad keltirgan.

Shuningdek, futbolchi shaxsiy loyihalarini ham rivojlantirgan: CR7 brendi ostida Pestana CR7 Hotels mehmonxonalar tarmog‘i (Portugaliyaning Pestana guruhi bilan hamkorlikda) va CR7 Fitness fitnes-markazlari ishlaydi. U padel-kortlarga sarmoya kiritgan, kiyim, oyoq kiyimlar, ichki kiyimlar, parfyumeriya va aksessuarlar ishlab chiqarishni yo‘lga qo‘ygan. 2024 yilda u Ispaniyadagi chinni ishlab chiqaruvchi kompaniyaga investitsiya kiritgan. Bloomberg uning biznes-aktivlari qiymatini 300 million dollardan yuqoriroq baholagan.

Materialda qayd etilishicha, Ronaldu endi moliyaviy jihatdan Lionel Messini ancha katta farq bilan ortda qoldirmoqda, argentinalik futbol yulduzining boyligi 600 million dollar atrofida baholangan.

Ronaldu milliardlik dovondan o‘tgan ilk futbolchi, ammo u bu boradagi birinchi sportchi emas. Bungacha Maykl Jordan (Forbes baholashicha — 3,8 milliard dollar boylikka ega) va Rodjyer Federer (1,3 milliard dollar atrofida) kabilar bu ro‘yxatga kirib bo‘lgandi.

Bloomberg aynan «An-Nasr» bilan shartnoma Krishni milliarderga aylantirganini qayd etgan. Saudiya klublari hozirda katta pullar sarflamoqda. FootyStats ma’lumotiga ko‘ra, ligada eng yuqori maosh oluvchi futbolchilar ro‘yxatida Karim Benzema, Ngolo Kante va Sadio Mane kabi yulduzlar ham bor.