Rossiya «Dojd» bosh muharriri va jurnalistlarini «terrorchilar» deb e’lon qildi

7 oktyabr, seshanba kuni Rosfinmonitoring «Dojd» telekanali bosh muharriri Tixon Dzyadko, shuningdek, uning axborot bo‘limi boshlig‘i Yekaterina Kotrikadze va boshlovchi Valeriya Ratnikovani «terrorchilar va ekstremistlar» ro‘yxatiga kiritdi.

«Terrorchilar» ro‘yxatiga qo‘shilish, boshqa narsalar qatori, ularning barcha Rossiya banklaridagi hisoblarini muzlatish va oylik xarajatlarini 10 000 rublgacha cheklashni anglatadi. «Interfaks»ning qayd etishicha, uchala jurnalist ham ro‘yxatda yulduzchasiz ko‘rsatilgan, u odatda «terrorchilik moddasi» bo‘yicha ish qo‘zg‘atilganini bildiradi.

Bir kun avval Tixon Dzyadko sirtdan hibsga olingani xabar qilingan edi. Moskvaning Golovinskiy sudi tergovchilarning iltimosiga binoan uni ikki oyga sirtdan hibsga olishga qaror qildi. U «chet el agenti» sifatidagi majburiyatlarini bajarishdan bo‘yin tovlaganlikda va Rossiya Qurolli kuchlari haqida «feyk xabarlar» tarqatganlikda ayblanmoqda. Jurnalist qidiruvga berilgan.

Iyul oyida Rossiya Tergov qo‘mitasi «chet el agentlari» reyestriga kiritilgan Yekaterina Kotrikadze, Valeriya Ratnikova va Tixon Dzyadkoga nisbatan jinoiy ish ochgan edi. «Dojd» jurnalistlari Ukrainaga qarshi urushni davom ettirayotgan Rossiya armiyasi haqidagi «feyklarda» va «chet el agenti» sifatidagi majburiyatlarini bajarishdan bo‘yin tovlaganlikda» ayblangan. Ish xabar messenjerlardan biridagi post tufayli ochilgan.