«Urushning yakuniga yaqinlashdik» – Zelenskiy Tramp bilan uchrashuvdan keyin

Ukraina prezidenti Volodimir Zelenskiy Vashingtonda AQSh prezidenti Donald Tramp bilan o‘tkazilgan navbatdagi uchrashuvda Ukraina o‘z hududlarini ixtiyoriy ravishda topshirmasligini ma’lum qilgan, shundan keyin Tramp urushni hozirgi front chizig‘ida muzlatish taklifini bergan. Shu bilan uchrashuv yakunlangan, deyiladi Reuters xabarida. Tramp muzokaralardan keyin jurnalistlar qarshisida o‘z taklifini takrorlagan, Zelenskiy ham bu pozitsiyani ma’qullagan.

Reuters suhbatdoshlari fikricha, Trampning pozitsiyasiga u Zelenskiy bilan uchrashuv arafasida RF prezidenti Vladimir Putin bilan o‘tkazgan telefon muloqoti ta’sir ko‘rsatgan.

The Washington Post gazetasi shanba kuni o‘sha muloqot chog‘ida Putin Ukrainadan Zaporijjya va Xerson oblastlarining bir qismi evaziga Donetsk oblastini to‘liq topshirishni talab qilayotgani haqida xabar qilgandi (xabardan gap Putin ushbu oblastlarning bosib olingan qismidan chekinishga rozimi yoki shunchaki ushbu oblastlarning hali Ukraina nazoratida qolayotgan qismiga ortiq da’vo qilmasligini nazarda tutganmi, buni bilib bo‘lmaydi).

Reuters manbalaridan biri qayd etishicha, amerikaliklar Zelenskiyga 17 oktyabr kungi uchrashuvda ham aynan shunday almashuvni taklif etishgan. Shu bilan birga, Tramp jurnalistlarga Ukraina vakillari bilan Donbassning topshirilishi ehtimolini «hech qachon muhokama qilmagani»ni aytdi.

Kremldagilar esa mojaroni to‘qnashuv chizig‘i bo‘ylab muzlatish g‘oyasini yana bir bor rad etishga ulgurdi. «Bu mavzu bir necha bor ko‘tarilgan, Rossiya-Amerika aloqalari davomida turli nyuanslar bilan ko‘tarilgan va Rossiya tomoni har safar javobini bergan, bu javob qandayligi esa yaxshi ma’lum: Rossiya Federatsiyasi pozitsiyasining izchilligi o‘zgarmaydi», – dedi Rossiya prezidenti matbuot kotibi Dmitriy Peskov.

Zelenskiy: urush yakuniga qarab bormoqda

«Biz urush tugashi ehtimoliga yaqinlashdik. Men buni aniq qilib aytyapman. Bu uning aniq tugashini anglatmaydi, ammo prezident Tramp Yaqin Sharqda ko‘p narsaga erishdi va bu to‘lqinda u Rossiyaning Ukrainaga qarshi urushini tugatmoqchi», – dedi Zelenskiy 19 oktyabr kuni jurnalistlarning savollariga javob berarkan.

Ukraina prezidenti o‘z fikrini batafsil tushuntirib bermagan. U faqat dunyoda urushni tugatish uchun kuchli siyosiy talab shakllanayotganini ta’kidladi. Zelenskiyning so‘zlariga ko‘ra, Ukraina bu kayfiyatdan Rossiyaga ham harbiy, ham diplomatik bosimni kuchaytirish uchun faol foydalanmoqda.