​​​​​​​Qaysi ilovalarda komissiyasiz pul o‘tkazish mumkin?

Eng avvalo, ikki jihatni ta’kidlash lozim:

• Humo'dan Humo'ga pul o‘tkazmalari uchun aksariyat ilovalarda komissiya olinmaydi (o‘tkazmalar miqdori bo‘yicha limitlar bo‘lishi mumkin).
• Bir qator banklar o‘zi chiqargan kartalar o‘rtasidagi o‘tkazmalar uchun komissiya olmaydi.

Bundan tashqari, ba’zi holatlarda biror bir kartaga komissiyasiz pul o‘tkazish zarurati yuzaga kelganda, qabul qiluvchi karta qaysi bankniki ekanini aniqlab, o‘sha bankning ilovasiga murojaat qilish foydali bo‘lishi mumkin. Bunda siz shartli “A” bankning ilovasini o‘rnatib, unga boshqa bankdan olingan o‘z kartangizni ulaysiz va “A” bank kartasiga komissiyasiz o‘tkazmani amalga oshirasiz.

Quyida – kartadan kartaga o‘tkazmalar (P2P) xizmatini komissiyasiz taqdim etadigan ilovalarni sanab o‘tamiz.

Oyiga 10 mln so‘mgacha:

• Alliance Pay (Asia Alliance Bank)
• BRB (Biznesni Rivojlantirish Banki)
• ChakanaPay (Agrobank)

Oyiga 5 mln so‘mgacha:

• Hamkor (Hamkorbank)
• Mavrid (Mikrokreditbank)
• OpenBank
• SQB Mobile (Sanoat Qurilish Bank)
• SelloPay
• Xazna (Xalq Banki)

Oyiga 3,5 mln so‘mgacha:

• DavrMobile (Davr Bank)

Oyiga 3 mln so‘mgacha:

• Milliy (Milliy bank). Ish haqi loyihasi mijozlari uchun komissiyasiz o‘tkazmalar limiti – 10 mln.
• My Turon (Turonbank).
• Paynet. Foydalanuvchi muayyan shartlarda komissiyasiz o‘tkazma limitini 5 mln so‘mgacha oshira oladi.

Oyiga 1 mln so‘mgacha:

• Humans. Kompaniya abonentlari uchun komissiyasiz limit 5 mln so‘m, Super VIP tarifi abonentlari uchun 10 mln so‘m.

Yuqoridagilardan tashqari, Ipak Yuli Bank'ning Visa Start (so‘m) kartasi va TBC Bank'ning Salom kartasi* (Humo) taqdim etadigan imkoniyatni alohida qayd etish mumkin. Bu kartalar egalari bankning ilovasi orqali kartani foizsiz to‘ldirishi va undan Uzcard/Humo kartalariga foizsiz o‘tkazmalarni amalga oshirish imkoniyatiga ega.

Bundan tashqari, Anorbank'ning Mastercard Milliy kartasi va Uzum Bank'ning Uzum kartasi (Visa, so‘m) ham shunday imkoniyatni beradi. Lekin o‘tkazmalar borasida bu kartalarning yuqoridagi ikki raqobatchisidan ayrim farqlari bor: oyiga 100 mln so‘mlik limit mavjud (Uzum kartada bu limitni faollashtirish uchun muayyan shartlar bor), qolaversa, komissiyasiz o‘tkazmalar aksiyasi 2025 yil 31 dekabrgacha amal qiladi.

Bugungi kun (24.10.2025) holatiga, ushbu to‘rtta kartani ham bepul rasmiylashtirish mumkin. Shu bilan birga, Anorbank Mastercard Milliy kartasiga yillik xizmat ko‘rsatish to‘lovi mavjud.

* Diskleymer: Salom kartasi balansidagi qoldiq mablag‘ uchun avtomatik tarzda, muayyan foiz stavkasida kunlik daromad hisoblab boriladi. Bu shakldagi daromad aholining muayyan qatlami uchun nozik masala bo‘lishi mumkin.