Bosh prokuratura huzuridagi Departament maʼlumotiga koʻra, holat idoraning Chirchiq shahri boʻlimi oʻtkazgan tergovga qadar tekshiruvda aniqlangan.
Tekshiruvda tijorat bankining bank xizmatlari markazi boʻlim boshligʻi O.R. fuqarolardan qabul qilingan mablagʻlarni kassaga kirim qilmagani qayd etilgan. U pullar goʻyoki qabul qilinganini koʻrsatish uchun omonat hisobvaraqlariga soxta maʼlumotlar kiritgan.
Departamentning bildirishicha, shu yoʻl bilan 13 nafar fuqaroga tegishli jami 1,3 mlrd soʻm oʻzlashtirish yoki rastrata yoʻli bilan talon-toroj qilingan.
Holat yuzasidan Jinoyat kodeksining 167-moddasi bilan jinoyat ishi qoʻzgʻatilgan. Hozirda tergov harakatlari olib borilmoqda.
