Pentagon noma’lum donordan 130 mln dollar oldi

Pentagon vakiliga ko‘ra, davlat idorasi bunday miqdordagi mablag‘ni xayriya sifatida qabul qilish vakolatiga ega. Pul harbiy xizmatchilarga oylik maosh to‘lashga yo‘naltiriladi. Shu bilan birga, Pentagon xayriya qilgan shaxs AQSh fuqarosimi-yo‘qmi, degan savolga javob berishdan bosh tortdi.

Politico qayd etishicha, Pentagon reglamentiga muvofiq, harbiylar yoki ularning oila a’zolari foydasiga 10 ming dollardan ortiq har qanday xayriya etika xodimlari tomonidan ko‘rib chiqilishi shart — «donorning manfaatlari ushbu xayriyadan jiddiy darajada ta’sirlanmasligi»ni aniqlash uchun.

AQSh prezidenti Donald Tramp Pentagonning noma’lum donorini bilishini ishora qildi, ammo shaxsni oshkor etmadi. U mablag‘ ajratilishini e’lon qilar ekan, xayriya ma’lum bir «do‘stlik» tuyg‘usi bilan amalga oshirilganini aytdi.

Oq uy rahbari shunga qo‘shimcha ravishda hukumat ishining to‘xtab qolishi uchun navbatdagi safar Demokratik partiyani aybladi — bu holat sabab davlat idoralarida, jumladan mudofaa tizimida ham xodimlar va tegishli tuzilmalarga maosh to‘lashda qiyinchiliklar yuzaga kelgan.

Shunga qaramay, berilgan summa barcha amerikalik harbiylarning maoshiga yetmaydi, deya yozadi Politico. Nashr ma’lumotiga ko‘ra, faqat oktyabr oyining birinchi yarmida shunga o‘xshash xarajatlar taxminan 6,5 mlrd dollarni tashkil etgan. Kelasi hafta Qo‘shma Shtatlar Kongressi harbiylarga maosh ajratishga imkon beradigan bir necha qonun loyihalarini ovozga qo‘yadi.

AQShda 1 oktyabrdan boshlab yangi moliyaviy yil budjeti bo‘yicha kelishuv yo‘qligi sabab qator davlat idoralari ishi rasman to‘xtatilgan — bu holat mamlakatda «shatdaun» deb ataladi.

Bunday vaziyat yuzaga kelishining sababi demokratlar va Tramp o‘rtasida kambag‘al fuqarolar uchun tibbiy sug‘urta dasturi (Obamacare)ni moliyalashtirish bo‘yicha kelishmovchiliklardir. Kongressdagi Demokratik partiya vakillari 2026 yil budjetiga tegishli bandlar kiritilmas ekan, uni qabul qilishdan bosh tortgan. Qonun chiqaruvchi organda aksariyat o‘rinlar respublikachilar qo‘lida bo‘lsa-da, demokratlar ovozisiz budjetni qabul qilishning imkoni yo‘q.

Shatdaun fonida Tramp davlat xizmatchilari ommaviy qisqartirilishini e’lon qildi. Adliya vazirligi ma’lumotlariga ko‘ra, yettita hukumat idorasidagi 4200 dan ortiq davlat xizmatchisiga mehnat shartnomasi bekor qilingani haqida bildirishnoma yuborildi — jumladan moliya, sog‘liqni saqlash va ta’lim vazirliklarida. Shu bilan birga, Tramp mudofaa vaziriga hukumat ishi to‘xtaganiga qaramay, harbiylarning maoshini ta’minlashni topshirdi.

Bu — 2018 yil oxiri–2019 yil boshidagi holatdan keyingi dastlabki shatdaun. O‘shandagi budjet blokadasi 35 kun davom etgan va AQSh tarixida eng uzog‘i bo‘lgan. Uning sababi Trampning Meksika chegarasida devor qurish uchun budjetdan milliardlab dollar ajratish talabi edi.