Toshkent yo‘lida yirik partiya iste’molga yaroqsiz go‘sht ushlandi

Viloyat IIB ma’lumotlariga ko‘ra, hodisa YPXning «Sirdaryo» postida sodir bo‘lgan. Yo‘l-patrul xizmati xodimlari «Qashqadaryo–Toshkent» yo‘nalishi bo‘ylab harakatlanib kelayotgan Cobalt rusumli avtomobilni to‘xtatgan.

Tekshiruv paytida avtomashina saloni va yukxonasida hech qanday hujjatlarsiz 250 kilogramm go‘sht mahsuloti tashilayotgani aniqlangan.

Barcha musodara qilingan partiya ekspertizaga yuborildi. Mutaxassislar mol go‘shti iste’molga yaroqsiz ekanini va inson salomatligi uchun jiddiy xavf tug‘dirishini aniqladi.

Ushbu holat yuzasidan tegishli materiallar rasmiylashtirilib, ish keyingi tergov harakatlarini o‘tkazish uchun Bosh prokuratura huzuridagi Departamentning hududiy boshqarmasiga yuborildi.