Kiyevga Tomahawk: siyosiy qaror Tramp qo‘lida

Pentagon uzoq masofali Tomahawk raketalarini Ukrainaga yetkazib berishga rozilik berdi — bu qaror AQShdagi zaxiralar yetarli, degan bahodan keyin qabul qilingan. Endi bu masala bo‘yicha siyosiy qarorni AQSh prezidenti Donald Tramp qabul qilishi kerak, deb 31 oktyabr kuni CNN telekanali masalaga «yaqin» uch nafar amerikalik va yevropalik amaldorga tayanib xabar qildi.

Kanal yodga solishicha, 2025 yil oktyabrida Ukraina prezidenti Volodimir Zelenskiy bilan tushlikda Tramp Kiyevga «Tomagavk» bermaslikni ma’qul ko‘rishi, chunki ular AQSh himoyasi uchun kerakligini aytgan edi. Shu bilan birga, jurnalistlar da’vo qilishicha, harbiylar o‘z baholarini Oq uyga oy boshida — Trampning Zelenskiy bilan uchrashuvidan oldin — yetkazgan.

CNN’ning ta’kidlashicha, Pentagonning ushbu bahosi Yevropadagi AQSh ittifoqchilarini ruhlantirgan — endi ularning fikricha, Vashingtonning raketa yetkazib berishni rad etish uchun «bahonalari kamaygan». Xabar chop etilgan paytga qadar Oq uy ham, Pentagon ham CNN’ning izoh so‘roviga javob bermagan.

Telekanal eslatishicha, avvalroq uning manbalari Tramp «raketalar masalasini kun tartibidan olib tashlamagani»ni aytgan va agar prezident tegishli buyruq bersa, ma’muriyat ularni Ukrainaga tezkor yetkazish rejalarini tayyorlab qo‘ygan.

Shu bilan birga, manbalarga ko‘ra, harbiylarda Kiyev raketalarni qanday joylashtirishi va shaxsiy tarkibni ulardan foydalanishga qanday o‘qitishi masalalari bo‘yicha savollar saqlanib qolmoqda. Eng ko‘p holatda «Tomagavk»lar suvusti yoki suvosti kemalaridan uchiriladi, ammo Ukraina dengiz kuchlari jiddiy zaiflashgan. Shu bois, jurnalistlar yozishicha, dengiz piyoda qo‘shinlari va quruqlik qo‘shinlari tomonidan yerusti qurilmalari ishlab chiqilgan va ularni Ukrainaga berish mumkin.

24 oktyabr kuni Londonda «ko‘ngillilar koalitsiyasi» uchrashuvi doirasida o‘tkazilgan matbuot anjumanida NATO bosh kotibi Mark Ryutte Tramp bilan Ukrainaga Tomahawk raketalarini yetkazish masalasini muhokama qilganini, bu g‘oyadan butunlay voz kechish haqida gapirishga hali erta ekanini aytdi.

«Aniqroq aytganda, “Tomagavk”lar bo‘yicha — prezident (Tramp) va men buni muhokama qildik. Masala prezident ko‘rib chiqishida qolmoqda, yana aytaman: bu — Qo‘shma Shtatlar qaror qiladigan masala», — deya Ryuttening so‘zlarini Reuters keltirdi. U har bir Ukraina ittifoqchisi Kiyevga qanday qurol berishi o‘zi hal qilishini ta’kidlab, «Tomagavk»larsiz ham AQSh Ukrainani sezilarli harbiy qo‘llab-quvvatlayotganini qo‘shimcha qildi.