Ukraina Tuapse porti va Rossiyaning turli hududlaridagi elektr podstansiyalariga hujum qildi

Ukraina dronlari 2 noyabrga o‘tar kechasi Krasnodar o‘lkasidagi Tuapse dengiz portiga hujum qildi, deb xabar berdi region operativ shtabi. Ma’lum qilinishicha, dronlardan birining parchalari neft tankeri ustiga qulagan, kemada yong‘in chiqqan, ekipaj evakuatsiya qilingan. Palubaning ustqurmasi shikastlangan. Bundan tashqari, neft quyish terminali inshootlari va infratuzilmasi shikastlangan. Tuapse okrugi rahbari Sergey Boyko shikastlanishlarni «arzimas» deb ta’rifladi.

Tuapse portida kamida uchta joyda yong‘in sodir bo‘ldi, deb xabar berdi Astra telegram-kanali guvohlarning suratlari va videolariga tayanib. Nashr ma’lumotlariga ko‘ra, ikkita yong‘in «RN-Morskoy terminal Tuapse» MChJning chuqur suvli prichal kompleksida, uchinchisi – Yujniy mol hududidagi neft quyish prichalida sodir bo‘lgan.

Bundan tashqari, Tuapsedagi temiryo‘l vokzali oynalari singan, shahardan 20 kilometr uzoqlikdagi Sosnovaya posyolkasida esa Ukraina droni parchalari ko‘p qavatli turarjoy binosiga qulagan, deb xabar berdi Krasnodar o‘lkasi operativ shtabi. Hujum natijasida jabrlanganlar yo‘q.

Rossiya mudofaa vazirligi xabar berishicha, 2 noyabrga o‘tar kechasi havo hujumidan mudofaa kuchlari Ukrainaning 164 ta dronini tutib olgan yoki urib tushirgan, ularning qariyb uchdan bir qismi Kuban yoki uning yaqinida: 39 ta qurilma Qora dengiz ustida, 32 tasi bevosita Krasnodar o‘lkasi ustida yo‘q qilingan.

«Ukrainskaya pravda» nashrining Ukraina xavfsizlik xizmatidagi manbasi ta’kidlashicha, dronlar Tuapsedagi tanker va port infratuzilmasiga zarba bergan. Nashr suhbatdoshining so‘zlariga ko‘ra, beshta dron urilishi natijasida tanker yonib ketgan va kamida to‘rtta neft quyish stenderi ishdan chiqqan. Port binolariga ham zarar yetgan, deya ta’kidladi nashr suhbatdoshi.

Tuapse portida Rossiya neftining eng yirik eksportchilaridan biri bo‘lgan «Rosneft» kompaniyasining neft terminali va neftni qayta ishlash zavodi joylashgan.

Shuningdek, 2 noyabrga o‘tar kechasi Ukraina harbiylari Rossiya hududlaridagi beshta elektr podstansiyasiga dronlar bilan hujum qildi, dedi Ukraina qurolli kuchlarining uchuvchisiz tizimlar kuchlari qo‘mondoni Robert Brovdi (laqabi «Madyar»). Ukrainaning Exelinova+ telegram-kanali ma’lumotlariga ko‘ra, energetika obektlari Kursk, Lipetsk, Oryol oblastlarida, shuningdek, Luhansk oblastining anneksiya qilingan qismidagi Alchevsk shahrida zarba ostida qolgan. Bundan tashqari, anneksiya qilingan Qrimda harbiy infratuzilma obektiga hujum qilingani aytilmoqda.

Ukraina Bosh shtabi hozircha bu hujumlar yuzasidan izoh bermadi.