Bosh prokuraturada Raqamli texnologiyalar markazi tashkil etiladi

Prezidentning PF–204-son (03.11.2025) farmoniga muvofiq, prokuratura tizimida raqamlashtirishni jadallashtirish maqsadida Bosh prokuratura tarkibida Raqamli texnologiyalar markazi tashkil etiladi. Markaz tergov va prokuror nazorati jarayonlariga IT yechimlarini joriy qilish, axborot tizimlarini integratsiya qilish va kiberxavfsizlikni kuchaytirish bilan shug‘ullanadi.

Foto: O‘zA

“Raqamli prokuratura – 2030” strategiyasi doirasida quyidagi yangiliklar amalga oshiriladi:

E-tergov axborot tizimi ishga tushirilib, jinoyat ishlarini yuritish jarayonlari to‘liq elektron formatga o‘tkaziladi;
sud ekspertizasi onlayn tarzda tayinlanadi; moddiy zararlarni hisobga olish va undirish bo‘yicha monitoring yo‘lga qo‘yiladi.

2026-2027 o‘quv yilidan Huquqni muhofaza qilish akademiyasida 4 yillik “Kiberhuquq” bakalavriat yo‘nalishi ochiladi.

Raqamli texnologiyalar markazi prokuratura organlarida IT infratuzilmasini rivojlantirish, tizimlararo integratsiya, ma’lumotlar xavfsizligi va foydalanuvchi qo‘llab-quvvatlash xizmatlarini markazlashtiradi.

Ushbu chora-tadbirlar tergov jarayonlarining shaffofligi va tezkorligini oshirish, ma’lumot almashuvida inson omili va qog‘ozbozlikni kamaytirish hamda fuqarolar murojaatlari va ish yuritishda samaradorlikni ta’minlashga qaratilgan.