NVIDIA bilan hamkorlikda OTM va sanoat uchun AI infratuzilmasi yo‘lga qo‘yiladi

Raqamli texnologiyalar vaziri Sherzod Shermatov AQShda NVIDIA rahbariyati bilan uchrashib, O‘zbekistonda sun’iy intellekt (SI) ekotizimi va infratuzilmasini rivojlantirish bo‘yicha kelishuvlarni muhokama qildi. Rejaga ko‘ra, OTM uchun NVIDIA asosidagi hisoblash quvvatlari, 1 MVtgacha quvvatli ikki AI-klaster va sanoat hamda davlat sektori uchun qo‘shimcha infratuzilmalar yo‘lga qo‘yiladi.

Foto: Raqamli texnologiyalar vazirligi

AQShda o‘tgan uchrashuv davomida O‘zbekiston va NVIDIA o‘rtasida SI sohasida keng qamrovli hamkorlik poydevori muhokama qilindi. Tomonlar qator yo‘nalishlar bo‘yicha ish olib borishni rejalashtirmoqda.

NVIDIA SIni boshqarish, ekotizimni rivojlantirish hamda ilg‘or xalqaro amaliyotlarni (ochiq va maxfiy bo‘lmagan ma’lumotlar doirasida) bo‘lishadi.

Zamonaviy NVIDIA texnologiyalari asosida «AI Excellence» markazini tashkil etish imkoniyatlari o‘rganilmoqda. Markaz professor-o‘qituvchilarni tayyorlash va mutaxassislar malakasini oshirish dasturlarini o‘z ichiga oladi (shu jumladan NVIDIA Deep Learning Institute materiallari asosida).

2026 yilgacha umumiy hisobda 1 MVtgacha hisoblash quvvatiga ega ikkita AI-klaster uchun texnik asos ishlab chiqiladi: biri ta’lim va ilmiy izlanishlarga, ikkinchisi raqamli hukumat, tibbiyot va sanoatdagi SI loyihalariga yo‘naltiriladi. Amalga oshirish alohida kelishuvlar va mavjud infratuzilma imkoniyatlariga bog‘liq bo‘ladi.

Shu bilan birga, qator milliy tashabbuslar e’lon qilindi, ular zarur kelishuv va tasdiqlar asosida NVIDIA bilan hamkorlikni qamrab olishi mumkin.

Yetakchi oliygohlarni NVIDIA superkompyuter infratuzilmasi bilan ta’minlash tashabbusi ko‘rib chiqilmoqda, moliyalashtirish ajratilgan, xarid 2025 yil IV chorakka mo‘ljallangan.

Oliygohlar o‘quv rejalariga SI yo‘nalishlari bosqichma-bosqich kiritiladi, ustozlar tayyorgarligi NVIDIA DLI kurslari asosida yo‘lga qo‘yiladi.

2026 yilda sanoat korxonalari, banklar va davlat tashkilotlariga qo‘shimcha NVIDIA AI infratuzilmasi joriy etish imkoniyatlari o‘rganiladi (taxminan 1 MVt quvvat, eksport nazorati talablariga muvofiq).

Raqamli egizaklar, robototexnika va sanoat AI yechimlarini sinash va joriy etish uchun taxminan 3 mln AQSh dollari sarmoya ko‘zda tutilgan, loyiha 2026 yilda start olishi kutilmoqda.

Mazkur hamkorlik O‘zbekistonning raqamli transformatsiya va barqaror texnologik rivojlanish bo‘yicha ustuvor yo‘nalishlarini global tajriba va platformalar bilan uyg‘unlashtirishga xizmat qiladi.