Ko‘ksaroyda Qosim-Jo‘mart To‘qayevga “Oliy Darajali Do‘stlik” ordeni topshirildi

Ko‘ksaroy qarorgohida Qozog‘iston prezidenti Qosim-Jo‘mart To‘qayevga O‘zbekiston Respublikasining oliy davlat mukofoti – “Oliy Darajali Do‘stlik” ordenini topshirish marosimi bo‘lib o‘tdi.

Marosimda davlat rahbari Qosim-Jo‘mart To‘qayevning ikki qardosh xalq o‘rtasida do‘stlik, yaqin qo‘shnichilik, strategik sheriklik va ittifoqchilik munosabatlarini mustahkamlashdagi ulkan shaxsiy xizmatlarini alohida ta’kidladi.

Qayd etilganidek, birgalikdagi sa’y-harakatlar tufayli ikki xalq o‘rtasidagi munosabatlar mutlaqo yangi taraqqiyot darajasiga chiqqan. Parlamentlar, hukumatlar, hududlar, biznes doiralari, jamoatchilik va yoshlar o‘rtasida faol hamkorlik yo‘lga qo‘yilgan, madaniy-gumanitar almashinuvlar izchil kengayib bormoqda.

Savdo aylanmasi barqaror o‘smoqda, sanoat, qishloq xo‘jaligi, energetika va transport sohalarida yirik kooperatsiya loyihalari amalga oshirilmoqda. Shuningdek, Qosim-Jo‘mart To‘qayevning global miqyosda tinchlik va barqaror rivojlanish, mintaqada ishonch va hamjihatlik muhitini mustahkamlash yo‘lidagi sa’y-harakatlari ham alohida e’tirof etildi.

Qozog‘iston prezidenti mazkur yuksak mukofot uchun O‘zbekiston rahbari va xalqiga minnatdorlik izhor etar ekan, qardosh mamlakatlar o‘rtasidagi do‘stlik va ittifoqchilik ruhidagi munosabatlar yanada mustahkamlanishiga ishonch bildirdi.