Ozarboyjon Markaziy Osiyo davlatlari rahbarlari maslahat uchrashuvining to‘la huquqli a’zosiga aylandi

Shavkat Mirziyoyev Markaziy Osiyo davlatlari rahbarlarining Maslahat uchrashuvida Ozarboyjonni bu formatga to‘la huquqli a’zo sifatida qabul qilish to‘g‘risida ishtirokchi mamlakatlar yetakchilari tomonidan prinsipial qaror qabul qilinayotganini e’lon qildi.

O‘zbekiston yetakchisi bu qaror mushtarak tarix, qardoshlik rishtalari, ma’naviy va madaniy yaqinlik bilan uzviy bog‘langan xalqlarimiz manfaatlariga to‘liq javob berishini ta’kidlagan.

Shuningdek, ushbu strategik qadam maslahat uchrashuvlariga kuchli shiddat berishiga, savdo-iqtisodiy, investitsiyaviy va madaniy-gumanitar hamkorlikni kengaytirish, barqaror taraqqiyot masalalari bo‘yicha hamjihatlikda qarorlar ishlab chiqish uchun yangi ufqlar ochishiga ishonch bildirdi.

– Mohiyatan biz Markaziy Osiyo va Janubiy Kavkaz o‘rtasida mustahkam ko‘prik barpo etmoqdamiz, hamkorlikning yagona makonini shakllantirishga yo‘l ochmoqdamiz. Bu ikki mintaqaning strategik bog‘liqligi va barqarorligini kuchaytirishi shubhasiz, – dedi prezident Shavkat Mirziyoyev.

Uchrashuvdan avval Ozarbayjon prezidenti bu uning ushbu tadbirda faxriy mehmon sifatida uchinchi bor ishtirok etishi ekanini ma’lum qilgandi. «Barcha hamkasblarim, ayniqsa, O‘zbekiston prezidenti, birodarim Shavkat Mirziyoyevga taklif hamda Ozarbayjonning ushbu muhim tadbirda ishtirokini qo‘llab-quvvatlagani uchun samimiy minnatdorlik bildiraman», – degandi Aliyev.