Rossiyada antidiskriminatsiya markazi "chet el agenti" deb e’tirof etildi

Rossiyadagi "chet el agentlari" ro‘yxatiga "Memorial" antidiskriminatsiya markazi, ruhoniy, saratovlik jurnalist, Kulturus festivali tashkilotchisi va Bashqirdiston haqidagi internet-OAV kiritildi.

Rossiya Adliya vazirligi antidiskriminatsiya markazi "Memorial"ni "chet el agentlar" reyestriga kiritdi. Bu qaror juma, 21 noyabr kuni e’lon qilindi. "Memorial" saytida qayd etilishicha, ushbu markaz ozchilik guruhlar, migrantlar va aholining zaif qatlamlari huquqlarini himoya qilish bilan shug‘ullanadi. 2024 yil mart oyida Rossiya shunga o‘xshash nomga ega bo‘lgan yana bir tashkilotni — Inson huquqlarini himoya qilish markazi "Memorial"ni ham "chet el agenti" deb e’tirof etgan edi.

Bundan tashqari, "chet el agentlari" ro‘yxati Estoniya yevangelist-lyuteran cherkovi ruhoniysi Pavel Zayakin, saratovlik jurnalist Yelena Nalimova, zamonaviy madaniyat va inson huquqlari bo‘yicha Kulturus festivali tashkilotchisi Anton Litvin, shuningdek "Aspekty Bashkortostana" internet-nashri bilan to‘ldirildi. RF Adliya vazirligi versiyasiga ko‘ra, ularning barchasi Rossiya hokimiyati va armiyasi haqida "feyk" tarqatgan, shuningdek Rossiyada nomaqbul tashkilotlar bilan hamkorlik qilgan.

"Chet el agentlari" to‘g‘risidagi qonunchilik Rossiyada 2012 yilda paydo bo‘lgan. Shu vaqtdan beri mingdan ortiq tashkilot va jismoniy shaxs ushbu "qora ro‘yxat"ga kiritilgan.

Jismoniy shaxslar — "chet el agentlari" reyestri 2022 yil aprel oyi boshlarida ishga tushirilgan bo‘lib, NNT-"chet el agentlari", OAV-"chet el agentlari" va ro‘yxatdan o‘tmagan tashkilotlar-"chet el agentlari" ro‘yxatlari qatorida to‘rtinchi shunga o‘xshash reyestrga aylandi. 2022 yil dekabridan e’tiboran RF qonunchiligi "chet eldan qo‘llab-quvvatlov" oluvchilarni, shuningdek "xorijiy ta’sir ostida bo‘lgan" shaxslarni ham "chet el agentlari" deb e’lon qilish imkonini beradi.