Adliya vazirligi tomonidan xorijdan olib kelinadigan «ko‘z shox pardasi» bioprotezlarini tibbiyot muassasalarida qo‘llash tartibiga oid nizom davlat ro‘yxatidan o‘tkazildi (ro‘yxat raqami 3710, 2025 yil 24 noyabr).
Mazkur Nizomda xorijdan olib kelinadigan «ko‘z shox pardasi» bioprotezlarini davlat tibbiyot muassasalarida qo‘llash tartibi aniq belgilab berilgan.
Unga ko‘ra, transplantatsiya amaliyotida foydalaniladigan «ko‘z shox pardasi» bioprotezlari faqat Vazirlar Mahkamasining 333-son qarorida ko‘rsatilgan davlat tibbiyot muassasalarida qo‘llanadi.
Xorijdan olib kelingan bioprotezlarni tashishda davlat tibbiyot muassasasining bir nafar tibbiyot xodimi mas’ul hisoblanadi. Bioprotezlar chegaradan olib kirilganidan so‘ng 12 soatdan kechiktirmay tegishli davlat tibbiyot muassasalariga yetkazilishi shart.
Bioprotezlarni tashish faqat maxsus sovitish uskunalari (konteynerlar)da, belgilangan haroratni saqlagan holda amalga oshiriladi. Ular davlat tibbiyot muassasalaridagi maxsus muzlatkichlarda 14 kundan oshmagan muddatda saqlanishi mumkin.
Nizomda belgilangan ushbu tartib va talablar «ko‘z shox pardasi» bioprotezlarining xavfsizligi va sifatli saqlanishini ta’minlash, shu orqali bemorlarga ko‘rsatiladigan oftalmologik yordam samaradorligini oshirishga qaratilgan.
