Toshkentlik Sergey: 38 yoshida Oq uygacha kelgan Serjio Gor o‘zi kim?
|17:55 / 29.11.202520 27310 min
Serjio Gor yoki Sergey Goroxovskiy. Oq uyning kadrlar bo‘yicha direktori, Trampning Markaziy va Janubiy Osiyo bo‘yicha maxsus vakili va endilikda AQShning Hindistondagi elchisi ham bo‘lgan asli toshkentlik yahudiy siyosiy figura. U 38 yoshidayoq Oq uygacha kelolgan Trampga sodiq amaldor. Xo‘sh, bu natijaga erishguncha asli ismi Sergey bo‘lgan Serjio qanday yo‘ldan yurdi?
Amerikada “O‘zbekistonning odami”
O‘zbekistondagi Amerika elchixonasiga ko‘ra, Serjio Gor endilikda AQSh-O‘zbekiston ishbilarmonlik va investitsiya kengashiga ham rahbarlik qiladi. Aynan Toshkentda tug‘ilgan Sergey bugun AQSh hukumatidagi O‘zbekistonga eng yaqin bo‘lgan odam, deb bemalol aytsa bo‘ladi.
Bir paytlar toshkentlik bo‘lgan yahudiy muhojir Serjio bugun AQShning bu mintaqa bo‘yicha siyosatida asosiy odamlardan biriga aylandi. Bugun 38 yoshda bo‘lgan Serjio Toshkentda tug‘ilib, ota-onasi bilan Maltaga ko‘chgach, Kospikua port shaharchasida katta bo‘la boshlaydi. U Maltaga borganida 8 yosh, oilasi AQShga ko‘chganida esa 13 yoshda edi. Isroil fuqarosi bo‘lgan Serjioning onasi Maltada biznes bilan shug‘ullangan, 1999 yilda esa ular Los-Anjyelesga ko‘chishga qaror qilishadi. AQShga borganida ham Sergey Goroxovskiy bo‘lgan yigitcha matbuot va siyosiy kayfiyatni tushuna boshlagach ismini Serjio Gorga aylantirib oladi.
Jorj Vashington universitetiga qabul qilinganida Serjio allaqachon konservativ g‘oyalar tarafdoriga aylangan edi. Kollej davridanoq u respublikachilar tomonida bo‘ldi va talabalardan iborat “Yosh Amerika jamg‘armasi”ni tuzishga urindi.
2008 yilgi prezident saylovlarida esa Gor Obamani qoralash kampaniyasi bir qismiga aylandi. Xususan, o‘sha paytda og‘izga tushgan Obamaning kam daromadli oilalar huquqlari va ijtimoiy adolat masalalari bilan shug‘ullanuvchi nodavlat faollik tashkiloti bilan aloqalarini bo‘rttirishga harakat qildi. Ya’ni Obamaning saylovoldi kampaniyasi pullaridan bu tashkilotga 800 ming AQSh dollari o‘tkazilgandi. Bu katta summa aslida firibgarlik uchun ishlatilganini gapiruvchi tanqidchilar qatorida 22 yoshli Serjio Gor ham bor edi.
Yahudiy muhojirning bu qadamlari bekorga emas, balki tezroq ko‘zga tashlanib, amaldorga aylanish maqsadlari ro‘yobi uchun edi.
Mavzuga oid
Kapitoliydagi matbuotchilik yillari
O‘qishni tugatganidan so‘ng Gor kampus faolligidan Kapitoliyga o‘tdi, ya’ni Amerika parlamentiga. Ayova shtatidan Stiv King va Minnesota shtatidan Mishel Baxman respublikachi kongressmenlarning so‘zlovchisi sifatida ishlay boshladi. Bu davrda Obama bilan mafkuraviy qarama-qarshilikda Serjio Gor asosiy xizmatchilardan bo‘ldi.
2013 yilga kelib u senator Rand Polning siyosiy harakatlar qo‘mitasiga o‘tdi va jamoatchilik bilan aloqalar bo‘limiga rahbarlik qildi. 5 yil davomida matbuot kotibi sifatida ishlagan Gor xabar almashish qobiliyatini o‘stirdi va tezkor xodimga aylandi. Lekin bu yillar albatta silliq kechmagan, u ichki nizolarga ham aralashib qolgan paytlar bo‘ldi.
Trampning orbitasi: mablag‘ yig‘ish va nashr etish davri
Gorning eng katta qadamlaridan biri 2020 yilda, Tramp g‘alabasi moliya qo‘mitasining shtab boshlig‘i lavozimiga o‘tganida edi. Ya’ni endi u Tramp jamoasiga yaqinlashdi. Ko‘p o‘tmay u kichik Donald Tramp bilan tanishib, turli broshyura va saylovoldi targ‘ibot materiallari, kitoblarini chop etish ishlariga bosh bo‘ldi. Lekin Gorning asosiy maqsadi kitob bosib o‘tirish emas, Tramp mexanizmidagi asosiy o‘yinchilardan biriga aylanish edi. Shuning uchun ham u qisqa muddatda Trampning ultra MAGA dasturini to‘liq qo‘llay boshladi.
2024 yilgi saylovlarda g‘alaba qozongan Tramp 2025 yil yanvarida Oq uyga qaytarkan, Gor uning komandasida kadrlar boshlig‘i bo‘ldi, ya’ni prezidentning kadrlar bo‘limi direktori. Bu anchagina katta lavozim edi. Shu bilan birga Serjio endi katta mas’uliyatni ham bo‘yniga olgan edi. Ya’ni Trampga sodiqlikni tekshirib, kerakli kadrlarni joy-joyiga qo‘yish uchun tavsiya berish lozim edi.
Lekin turli nashrlarning yozishicha, Gorning kadrlar bo‘yicha hamma qarashlari ham jamoa bilan mos kelmadi. Masalan, Ilon Mask NASA rahbarligiga bildirgan nomzodni Serjio Gor imkon qadar rad etishga urindi. Mask esa uni o‘z ijtimoiy tarmoqlarida «ilon» deb atadi.
Shu yilning avgust oyida prezident Tramp Serjio Gor nomzodini Markaziy va Janubiy Osiyo bo‘yicha maxsus vakil hamda AQShning Hindistondagi elchisi bo‘lishga ko‘rsatdi.
Tramp kelgach Vashington-Dehli munosabatlari chigallashib, bu aloqalar endi qayta tiklanayotgan bir onda Hindistonga elchi bo‘lish – katta diplomatik rol degani. Gorning bu lavozim uchun mos ko‘rilishi esa o‘z karerasida inqilob edi, ya’ni kechagina kollej zallarida faol bo‘lgan asli toshkentlik yahudiy endi AQSh tashqi siyosatida muhim figuralardan biri, muhim lavozim egasiga aylanmoqda. Amerikaliklar ko‘z o‘ngida bu dramatik bo‘lib ko‘rinadi.
Serjio Gor bugun O‘zbekistonning Amerika hukumatidagi muhim odami ham. Hafta boshida AQShning O‘zbekistondagi elchixonasi endi u ikki davlatning ishbilarmonlik va investitsiya kengashiga ham rais bo‘lganini e’lon qildi.
Shu yilning sentabr oyida O‘zbekiston prezidenti BMT bosh assambleyasi sessiyasida qatnashish uchun Nyu-Yorkka borganida, unga ajratilgan qarorgohda Gor bilan ham ko‘rishdi. O‘shanda media Serjiodan fikr so‘raganida, u Mirziyoyev deyarli hamma masalada gaplashganini bildirgan.
Oktyabr oxirida, prezident Vashingtonga borishidan 1 hafta oldin Serjio Gor boshchiligidagi delegatsiya Toshkentga keldi. U ancha iliq kutib olingan, prezidentga Trampning salomi bilan sovg‘alarini yetkazgan Gor AQShga qaytgach, O‘zbekiston yaxshigina mehmon qilganini aytib qo‘ydi.
O‘zbekiston tashqi ishlar vazirining o‘zi masalan Gorni mehmon qilish ishlariga bosh-qosh bo‘ldi, o‘zbek qo‘shiqchilari maxsus vakil bilan suratga tushib, Instagram’ga joyladi.
Nyu-Yorkdagi tadbirlar doirasida AQSh prezidenti mintaqadan faqat bitta, ya’ni O‘zbekiston prezidenti bilan uchrashishga vaqt topdi. Kun.uz’ning Amerikadagi manbalariga ko‘ra, bu uchrashuvni belgilashda ham Serjio Gorning hissasi katta bo‘lgan. So‘nggi daqiqalarda u Trampni aynan Mirziyoyev bilan uchrashishga undagan. Tramp Gor haqida yaxshi gaplar gapiradi, maqtab turadi.
Hindistonga elchilik
Serjio yaqin orada elchilik lavozimiga to‘liq kirishish uchun Hindistonga keladi. Hind medialari bu insonning Hindistonga elchi bo‘lganini turlicha tomondan yoritmoqda. Masalan, Times of India Gorning bir vaqtning o‘zida ikki vazifa – Markaziy va Janubiy Osiyo bo‘yicha maxsus vakil ham ekanligidan xavotirda. Media buni biroz tushunarsiz, deb yozgan.
Free Press Journal nashri esa Serjioni diplomat odam emas va tajribasi kam kadr, faqat Trampga yaqin figura deya baholagan.
The Quint nashri maqolasida esa bunday odamlarning elchilikka tayinlanishi risklarni keltirib chiqarishi mumkinligi yozilgan, ayniqsa Pokiston bilan aloqalar sahifasida.
Hindistonlik siyosatchi Shashi Tharor fikricha, aynan Gorning elchi bo‘lishi yaxshi signal. Chunki u hozirgi AQSh rahbariga juda yaqin odam. Ko‘rinib turibdiki, hind tomoni Gorga nisbatan to‘la ijobiy simpatiyada emas.
O‘zbekistonga kelsak, ha, Gor O‘zbekiston uchun Amerikadagi asosiy odamlardan biriga aylanmoqda. Buni qo‘polroq qilib aytsak, Serjio Gor yoki o‘tmishdagi Sergey Goroxovskiy rasmiy Toshkentning Tramp jamoasidagi ko‘zi-qulog‘i bo‘lmoqda.
Xo‘sh, qanday qilib 38 yoshida Gor Amerikadek davlatning rasmiylari ichida katta siyosiy figuraga aylana oldi, gap uning bilimidami? Yo‘q, birinchi navbatda Serjio avval boshidan shu maqsad uchun harakat qilgan. Gorning traektoriyasi Vashington uchun yangi kuch dinamikasini aks ettiradi – bu mediani juda yaxshi bilish, strategiya bilan harakatlanish va bitta ideologiyaga sodiq bo‘lish. Fakt shuki, Trampning komandasida ishongan odamlaridan biri sobiq Sovet ittifoqida tug‘ilgan. Saylov oldidan media bu sarlavhaga ham alohida urg‘u bergandi. Hindiston bilan sahifada nimalar bo‘lishi noma’lum, lekin Serjio Gorning familiyasi hali matbuotda yangraydi.
