Germaniya Falastin davlatini tan olmaydi – Mers

Germaniya yaqin kelajakda Falastin davlatini tan olmaydi, dedi GFR kansleri Fridrix Mers Isroil bosh vaziri Binyamin Netanyahu bilan birgalikda o‘tkazgan matbuot anjumanida.

Germaniya hukumati rahbarining qayd etishicha, avvalo tinchlik rejasini qadamba qadam amalga oshirish muhim hisoblanadi. 

"Oxiri nima bo‘lishini hech kim bilmaydi. Shunday ekan, GFR hukumati Yevropaning boshqa davlatlaridan farqli o‘laroq, Falastin davlatini tan olishdan voz kechdi. Yaqin kelajakda ham tan olmaymiz", - dedi Mers. 

Uning so‘zlariga ko‘ra, hozircha Falastin davlatini tashkil etish uchun "sharoit yo‘q".

22 sentabr kuni Fransiya prezidenti Emmanuel Makron BMT Bosh Assambleyasining ochilish majlisida mustaqil Falastin davlatini tan olganini e’lon qildi. Undan bir kun oldin xuddi shu haqda Buyuk Britaniya, Kanada, Avstraliya va Portugaliya ham ma’lum qilgan edi. Umuman olganda, 22 sentabr holatiga ko‘ra, BMTning 153 a’zo davlati, shuningdek, Vatikan Falastin mustaqilligini tan olishi qayd etilgan.