Tramp Zelenskiydan “biroz ranjigani”ni aytdi

Ukrainaga Rossiyaning Ukrainaga qarshi urushida tinchlikka erishishga qaratilgan AQShning so‘nggi taklifi “yoqadi”, ammo mamlakat prezidenti Volodimir Zelenskiy hali u bilan tanishib chiqmagan. Bu haqda AQSh prezidenti Donald Tramp 7 dekabr, yakshanba kuni Vashingtonda Kennedi markazi mukofotlarini topshirish marosimi doirasida jurnalistlar savollariga javob berar ekan ma’lum qildi.

“O‘tgan haftadagi muzokaralardan keyin biz prezident (RF prezidenti Vladimir — tahr.) Putin bilan ham, Ukraina rahbarlari, jumladan prezident (Ukraina prezidenti Volodimir — tahr.) Zelenskiy bilan ham gaplashdik. Va aytishim kerakki, prezident Zelenskiy hali (so‘nggi tinchlik — tahr.) taklifini o‘qib chiqmaganidan biroz ranjiganman, bu — bir necha soat oldingi holat”, — dedi Tramp. Jurnalistlar bilan muloqotni aks ettiruvchi videorolik Oq uyning YouTube-kanalida e’lon qilindi.

“Uning odamlariga (Ukraina prezidenti Volodimir Zelenskiyning atrofidagilarga — tahr.) bu (tinchlik taklifi — tahr.) juda yoqyapti, lekin u uni o‘qimagan. Rossiya unga rozi. Bilasizmi, agar o‘ylab ko‘rsak, Rossiya butun mamlakatni qo‘lga kiritishni ma’qul ko‘rardi. Lekin, Rossiya (bu rejaga) rozi. Biroq Zelenskiy unga rozimi-yo‘qmi, shu borada ishonchim komil emas”, — deya qo‘shimcha qildi Tramp. U “uning odamlari” deganda Zelenskiy delegatsiyasini nazarda tutyaptimi yoki Ukraina xalqinimi, buni aniqlashtirmadi.

Bu orada Volodimir Zelenskiy 7 dekabr kuni kechqurun o‘zining Telegram-kanalida AQSh prezidentining maxsus vakili Stiven Uitkoff va Trampning kuyovi Jared Kushner bilan o‘tgan telefon suhbati haqida so‘zlab berdi. “Amerika elchilari Ukrainaning asosiy pozitsiyalarini yaxshi biladi va suhbat konstruktiv bo‘ldi, ammo oson kechmadi”, — deya ta’kidladi Ukraina rahbari.

Zelenskiyning aytishicha, Mayamidagi muzokaralarda Ukraina delegatsiyasini ifodalagan Ukraina Milliy xavfsizlik va mudofaa kengashi kotibi Rustem Umerov va Ukraina Qurolli kuchlari Bosh shtabi boshlig‘i Andrey Gnatov uni natijalar haqida ma’lumot bilan tanishtiradi, shundan so‘ng u Bryussel va Londondagi uchrashuvlarda Yevropa yetakchilari bilan gaplashishni rejalashtirgan.

Bundan avval, 6 dekabr kuni, AQSh prezidentining Ukraina bo‘yicha maxsus vakili Kit Kellog Ukrainadagi urushni to‘xtatish bo‘yicha kelishuv “chindan ham imzolanishiga juda yaqin” ekanini aytgan, uning taqdiri esa ikki asosiy masalani hal etishga bog‘liqligini ta’kidlagan: Donbassning kelajagi va Zaporijjya atom elektrostansiyasi (ZAES). “Agar shu ikki masalani hal qila olsak, qolgan hamma narsa nisbatan oson hal bo‘ladi, deb o‘ylayman”, — degan edi Kellog.

Reuters agentligi ma’lumotlariga ko‘ra, bugungi kunga kelib, Rossiya Ukraina hududining 19,2 foizini nazorat qilmoqda. Buning ichiga Qrim, Luxansk viloyatining barcha hududi, Donetsk viloyatining 80 foizidan ortiq qismi, Xerson va Zaporijjya viloyatlarining taxminan 75 foizi, shuningdek Xarkiv, Sumi, Mikolayiv va Dnipropetrovsk viloyatlarining ayrim hududlari kiradi.

AQShning dastlabki takliflariga ko‘ra, ZAESda ish qayta tiklanishi, u esa Atom energiyasi xalqaro agentligi (AEXA) nazorati ostida bo‘lishi kerak. Stansiyada ishlab chiqarilgan elektr energiyasi esa Rossiya va Ukraina o‘rtasida taqsimlanishi nazarda tutilgan.

Kutilishicha, 8 dekabr kuni Germaniya, Fransiya va Buyuk Britaniya yetakchilari Londonda uchrashib, Mayamida Ukraina va AQSh delegatsiyalari o‘rtasida o‘tgan muzokaralar natijalari asosida Ukrainada tinchlikka erishish bo‘yicha keyingi qadamlarni muvofiqlashtiradi.