Qoʻshimcha funksionallar
-
Tungi ko‘rinish
Xovos tumanida hokim almashdi
Sirdaryo viloyati hokimi Erkinjon Turdimov rahbarligida keskin tanqidiy ruhda o‘tkazilgan yig‘ilishda Ulug‘bek Yo‘ldoshev ishdan olinib, uning o‘rniga Qomus Yuldashev Xovos tumani hokimi etib tasdiqlandi.
9 dekabr kuni Xovos tumanida Xalq deputatlari tuman kengashining navbatdan tashqari sessiyasi o‘tkazildi. Tahliliy-tanqidiy ruhda o‘tgan sessiya ishida viloyat hokimi Erkinjon Turdimov ishtirok etdi.
Erkinjon Turdimov o‘z nutqida tumanda bir qator muhim yo‘nalishlarda jiddiy qoloqlik va sustkashlik holatlari mavjudligini keskin tanqid qilgan.
Kambag‘allikni qisqartirish, aholi bandligini oshirish, investitsion loyihalarni ishlab chiqish va amalda yo‘lga qo‘yish, eksport hajmini ko‘paytirish kabi ustuvor masalalarda tuman birinchi rahbarining tashabbusi, mas’uliyati va talabchanligi yetarli darajada emasligini bildirgan.
Tumanni yanada rivojlantirish borasida ishga solinmagan imkoniyatlar haqida deputatlar ham o‘z fikrlarini bildirishgan.
Sessiyada tashkiliy masala ko‘rilgan. 2023 yil avgustidan shu kunga qadar tuman hokimi lavozimida ishlab kelgan Ulug‘bek Hasanovich Yo‘ldoshev egallab turgan lavozimidan ozod etildi.
Deputatlar tomonidan Yuldashev Qomus Mirovich nomzodi Xovos tumani hokimi lavozimiga tasdiqlandi.
Ma’lumot uchun, Qomus Yuldashev 1983 yilda Sirdaryo viloyatining Shirin shahrida tug‘ilgan. 2004 yilda Toshkent to‘qimachilik va yengil sanoat institutini tamomlagan.
Hozirgacha Raqobatni rivojlantirish va iste’molchilar huquqlarini himoya qilish qo‘mitasi Sirdaryo viloyati hududiy boshqarmasi boshlig‘i lavozimida ishlab kelayotgandi.
