Tuman havodagi mayda zarrachalar miqdorini oshirishi mumkin - O‘zgidromet

Toshkent shahri va ayrim viloyatlarda kuzatilgan qalin tuman oqibatida havoda PM2,5 va PM10 kabi mayda zarrachalar miqdori oshishi mumkinligi ma’lum qilindi. O‘zgidrometga ko‘ra, bunga mamlakatga kirgan sovuq va nam havo massalari, shamol sustligi, inversiya hamda havodagi changning katta qismi tashqi hududlardan kirib kelayotgani sabab bo‘lmoqda.

Foto: Kun.uz

Maxsus komissiya topshirig‘iga muvofiq, O‘zgidromet ma’lumotiga ko‘ra, Toshkent shahri va ayrim viloyatlarda kuzatilgan tuman oldindan prognoz qilingan bo‘lib, u havoda PM2,5 va PM10 kabi mayda zarrachalar miqdorining oshishiga sabab bo‘lishi mumkin.

Mutaxassislar ta’kidlashicha, tumanning asosiy sababi mamlakat hududiga kirgan sovuq va nam havo massalaridir. Avvalroq shu kunlarda havo sezilarli darajada sovishi haqida ham ma’lum qilingan edi.

Shu bilan birga, O‘zgidromet ma’lumotlariga ko‘ra, mamlakat havosidagi changning 55–60 foizi tashqi hududlardan keladi. Oxirgi kunlarda shamol sustligi, inversiya hodisasi va hozirgi tuman tufayli ushbu zarrachalar havoda to‘planib, tarqalmay turib qolmoqda.

Tayyorlagan: Отабек Матназаров

#O‘zgidromet #tuman