Ukrainaning sunʼiy yoʻldosh aloqasidagi cheklovlar haqidagi bayonotlari bu ikki tizim oʻrtasidagi farqlarga yana eʼtibor qaratdi. Kiyev cheklovlar dronlar va havo hujumidan mudofaa tizimlari ishini qiyinlashtirganini bildirgan.
Ilon Mask esa Starlink va Starshield alohida tizimlar ekanini taʼkidlagan. Uning bayonotiga koʻra, Starshield tizimlari AQSH hukumatiga tegishli va uning nazoratida boʻlib, foydalanishga oid cheklovlarni Amerika harbiylari yoki prezidenti belgilaydi.
Starlink - keng omma uchun internet
Starlink - SpaceX’ga tegishli tijoriy sunʼiy yoʻldosh interneti xizmati. Undan uy xoʻjaliklari, sayyohlar, kemachilik kompaniyalari va aviakompaniyalar foydalanadi. Internetga ulanish uchun maxsus qabul qiluvchi terminal kerak boʻladi.
Tarmoqning dastlabki sunʼiy yoʻldoshlari 2019-yilda uchirilgan. Ular past Yer orbitasida ishlagani sababli, ancha balandda joylashgan anʼanaviy aloqa sunʼiy yoʻldoshlariga nisbatan signal kechikishini kamaytirish imkonini beradi.
Maskning tushuntirishicha, Starlink SpaceX nazoratidagi tijoriy xizmat boʻlib, undan fuqarolik yoki mudofaa maqsadlarida foydalanish mumkin. U kompaniya hujumkor harbiy operatsiyalarda Starlink’dan foydalanishga ruxsat bermasligini aytgan.
Starshield - himoyalangan aloqa va harbiy vazifalar uchun
Starshield SpaceX’ning davlat, jumladan, milliy xavfsizlik sohasidagi buyurtmachilar uchun sunʼiy yoʻldosh tizimlarini ishlab chiqish yoʻnalishidir. Uning vazifalari internetga ulashdan kengroq: himoyalangan aloqa, Yerni kuzatish va sunʼiy yoʻldoshlarga maxsus datchiklar hamda boshqa uskunalarni joylashtirishni qamrab oladi.
SpaceX maʼlumotiga koʻra, Starshield Starlink’ni yaratishda toʻplangan texnologiyalar va muhandislik tajribasiga tayanadi. Himoyalangan aloqa xizmatlarida kuchaytirilgan shifrlash, maxsus terminallar va alohida tarmoq shlyuzlari qoʻllanadi.
Shu bilan birga, Starshield’ni faqat Starlink’ning harbiy tarif rejasi sifatida tushunish toʻgʻri emas. Dastur doirasida maxsus sunʼiy yoʻldoshlar va alohida buyurtmalarga mos tizimlar ham ishlab chiqiladi.
Nega ikki tizim oʻrtasidagi chegara aniq emas?
