Sidneydagi plyajda odamlar o‘qqa tutildi. Qurbonlar bor

Ikki kishi plyajdagi odamlarni o‘qqa tutgan. Kamida 12 kishi halok bo‘lgan. Hujum ijrochilaridan biri oddiy fuqaro tomonidan qurolsizlantirilgan.

{Yii::t(}

O'tkazib yuborish 6s

O'tkazib yuborish

14 dekabr kuni Avstraliyaning Sidney shahri hududidagi Bondi plyajida otishma ro‘y berdi. Guvohlarning mahalliy televideniye efirida aytishicha, qora kiyingan ikki shaxs piyodalar ko‘prigida turgan holda plyajdagilarni o‘qqa tutgan. Ijtimoiy tarmoqlarda hujum qilgan shaxslar aks etgan videoyozuvlar tarqalgan.

Otishma yahudiylarning diniy bayrami hisoblangan Xanukining ilk kunida ro‘y berdi – bu bayram 14 dekabrdan 22 dekabrgacha nishonlanadi. Otishma boshlangan mahalda plyajda sham yoqish marosimi bo‘lib o‘tayotgandi.

Mahalliy nashrlar avvaliga kamida 10 kishi halok bo‘lib, 60 kishi yaralanganini xabar qildi.

«Men yerda qonga belanib yotgan kamida 10 kishini ko‘rdim», degan jurnalistlarga guvohlardan biri. The New York Times xabariga ko‘ra, kamida o‘n kishi shifoxonaga yotqizilgan.

Guvohlardan biri jami 50 ga yaqin o‘q ovozini eshitganini aytgan. Boshqa bir guvohning so‘zlariga ko‘ra, otishma 10 daqiqaga yaqin davom etgan. U ro‘y bergan hodisani «yerdagi jahannam»ga qiyoslagan.

Bu vaqtda plyaj hududida ikki mingga yaqin kishi bo‘lgan. Ijtimoiy tarmoqlarda tarqalgan kadrlarda plyaj hududidan yuzlab kishilar har tomonga qochib borayotganini ko‘rish mumkin.

ABC telekanali muxbiri bilan gaplashgan guvohlar avvaliga o‘q ovozlarini mushakbozlik deb o‘ylashganini aytishgan. Ulardan biri plyaj yaqinidagi restoranda oila a’zolari bilan kechki ovqatni qilayotganida otishma boshlangani va ular darhol kiyim almashtirish xonasidagi o‘rindiqlar ortiga yashirinishgani, plyaj tomondan yarador holatdagi kishilar ularning oldiga yugurib kelganini aytib bergan.

So‘nggi ma’lumotlarga ko‘ra, hujum qilganlar ikki kishi bo‘lgan. Ulardan biri politsiyachilar bilan otishma chog‘ida o‘ldirilgan, ikkinchisi yaralangan holda qo‘lga olingan, uning ahvoli og‘ir deb baholanmoqda.

Ijtimoiy tarmoqlarda tarqalgan videoga ko‘ra, otishma ijrochilaridan biri o‘tkinchi fuqaro tomonidan qurolsizlantirilgan. Videoda mashinalar orasida yashirinib turgan oddiy fuqarolardan biri miltiqli odamga orqadan sezdirmasdan yaqinlashgani va uni bo‘g‘ib, qurolini tortib olganini ko‘rish mumkin.

Ammo o‘tkinchi qurolni tortib olganidan keyin uni qo‘yib yuborgan, u esa sherigining oldiga qaytib, boshqa qurolni olgan va otishmani davom ettirgan. U katta ehtimol bilan, o‘zini qo‘yib yuborgan shaxsni ham otib tashlagan.

Ko‘p o‘tmay politsiyachilar u va sherigini o‘rab olgan va zararsizlantirgan.

Poytaxti Sidney bo‘lgan Yangi Janubiy Uels shtati bosh vaziri Kris Minns matbuot anjumanida otishma oqibatida jami 12 kishi halok bo‘lganini ma’lum qildi. U ro‘y bergan hodisani Sidneydagi yahudiylar jamoasiga qarshi amalga oshirilgan hujum deb atagan. Shtat politsiyasi komissari Mel Leyon 29 kishi yaralanganini aytgan, ulardan ikki nafari politsiyachilar. Leyon amalga oshirilgan hujumni terakt deb baholagan. Komissarning qo‘shimcha qilishicha, yaradorlar orasida bir yosh bola ham bor. Dastlabki ma’lumotlarga ko‘ra, qurbonlar orasida bolalar yo‘q.

Isroillik jurnalist Naftali Xananiyaning yozishicha, otishma vaqtida ravvin Eli Shlanger ham halok bo‘lgan.

Newsru.co.il nashriga ko‘ra, jabrlanganlar orasida Isroil–Avstraliya kengashi raisi Arsen Ostrovskiy ham bor, u boshidan jarohat olgan.

ABC telekanalining huquq-tartibot organlaridagi yuqori martabali manbasi hujum qilganlardan birining shaxsini ochiqlagan – bu Narvid Akrom bo‘lib, uning Sidney shahri chekkasidagi uyida tintuv o‘tkazilgan.

Ma’lum bo‘lishicha, u Pokistondan kelgan mehnat muhojiri bo‘lib, Sidneyda taksichilik qilgan.

News.com.au nashrining politsiyadagi manbasi bu hujumga bir necha oy mobaynida tayyorgarlik ko‘rilgan deb hisoblamoqda.

Voqea joyida amaliyot davom ettirilmoqda, politsiyachilar aholini bu hududdan uzoqroq bo‘lishga chaqirgan. So‘nggi ma’lumotlarga ko‘ra, bu hududda qo‘lbola portlovchi qurilma ham topilgan. Politsiya otishmani telefon yoki videoregistrator orqali tasvirga olganlardan kadrlarni huquq-tartibot organlariga taqdim etishni so‘ragan.

Avstraliya bosh vaziri Entoni Albaniz Sidneydagi otishmani «shokka tushiruvchi va xavotir uyg‘otuvchi» hodisa deb atadi. U Milliy xavfsizlik qo‘mitasining vazirlar ishtirokidagi yig‘ilishini chaqirtirgan.

«Biz yaralanganlar sog‘ayib ketishi uchun duo qilamiz… va vafot etganlar uchun ham duodamiz», – degan Isroil prezidenti Ishoq Hersog. U Avstraliya hukumatini «jamiyatni zaharlayotgan antisemitizmning ulkan to‘lqiniga qarshi kurashish choralarini ko‘rish»ga chaqirdi.

Hujum Avstraliya imomlar kengashi tomonidan ham qoralandi. «Jamiyatimizda bunday zo‘ravonlik va jinoyatlarga o‘rin yo‘q. Aybdorlar to‘liq va qat’iy javobgarlikka tortilishi kerak», – deyiladi kengash bayonotida.