Davriy bojxona to‘lovlari uchun grafik rasmiylashtirish qoidalari e’lon qilindi

Adliya vazirligida “Davriy bojxona to‘lovlarini to‘lash grafigini to‘ldirish tartibi to‘g‘risida”gi yo‘riqnoma davlat ro‘yxatidan o‘tkazildi. Ro‘yxat raqami — 3724, ro‘yxatdan o‘tkazilgan sana — 2025 yil 12 dekabr.

Yo‘riqnomaga ko‘ra, grafik deklaratsiyalovchi shaxs tomonidan quyidagi hollarda bojxona organiga taqdim etiladi:

tovar(lar)ni vaqtincha olib kirish bojxona rejimiga joylashtirishda davriy bojxona to‘lovlarini har oyda yoki yilning har choragida to‘lash ma’lum qilingan taqdirda;
bojxona to‘lovlaridan shartli ozod etish bo‘yicha berilgan imtiyozlarning amal qilish muddati tugashi munosabati bilan vaqtincha olib kirishning keyingi muddatida davriy bojxona to‘lovlarini to‘lash lozim bo‘lganda.

Shuningdek, bojxona yuk deklaratsiyasi (BYuD) qog‘oz shaklda bojxona organiga taqdim etilgan taqdirda, grafik ham qog‘oz ko‘rinishida A4 formatdagi 4 nusxada rasmiylashtirilishi belgilangan. Nusxalar quyidagicha taqsimlanadi:

• 1-nusxa — bojxona posti uchun;
• 2-nusxa — deklaratsiyalovchi shaxs uchun;
• 3- va 4-nusxalar — deklarant uchun.

Qayd etilishicha, grafikning har bir nusxasi deklaratsiyalovchi shaxs hamda bojxona organining mansabdor shaxsi tomonidan tasdiqlanadi.