MI6ʼning yangi rahbari Blez Metreveli o‘zining ilk ommaviy nutqida Rossiya tomonidan kelayotgan «o‘ta keskin tahdid» haqida ogohlantirdi.
Reutersʼning yozishicha, u «gibrid urush» deb ataladigan usullarni alohida ta’kidlagan. Bunga kiberhujumlar, shuningdek, muhim infratuzilma obektlari yaqinida Rossiyaga aloqador tuzilmalar uchirgani gumon qilinayotgan dronlar kiradi.
Metreveli bu holatni «tajovuzkor, kengayishparast va revizionist Rossiya tomonidan yuzaga kelayotgan o‘ta jiddiy tahdid» sifatida ta’riflagan.
U Ukrainadagi urushga ishora qilar ekan, Buyuk Britaniya Ukraina nomidan prezident Vladimir Putinga bosimni davom ettirishini qat’iy ta’kidlaydi.
«(Vladimir) Putin shubha qilmasin: bizning qo‘llab-quvvatlashimiz uzluksizdir. Ukraina nomidan ko‘rsatayotgan bosimimiz davom etadi. Xaos eksporti Rossiyaning xalqaro maydondagi yondashuvida kamchilik emas, balki o‘ziga xos xususiyatdir. Va biz Putin o‘z hisob-kitoblarini o‘zgartirishga majbur bo‘lguniga qadar bu holat davom etishiga tayyor bo‘lishimiz kerak», deya Metrevelining so‘zlarini keltirmoqda Reuters.
Blez Metreveli oktyabr oyida Richard Murning o‘rnini egalladi va Britaniya Tashqi razvedka xizmatining (MI6) 100 yildan ko‘p tarixida ushbu lavozimni egallagan ilk ayol rahbar bo‘ldi.
BBC nashrining yozishicha, MI6ʼga 1999 yilda ishga kirgan Metreveli yuqori lavozimga "Q Branch" orqali yetib kelgan. Bu tuzilma – Tashqi razvedka xizmatining yopiq va maxfiy bo‘limi bo‘lib, u agentlarga fosh etilmasdan va qo‘lga tushmasdan o‘z rahbarlari bilan aloqa qilish imkonini beradigan turli texnik vositalar va qurilmalarni ishlab chiqadi.
Shu sababli u o‘z nutqida Britaniya xavfsizligiga tahdidlarga qarshi kurashishda texnologiyalardan foydalanishni keskin oshirish zarurligini ta’kidlagan.
