So‘rov: ukrainlarning ko‘pchiligi armiyani Donbassdan olib chiqishga qarshi

Ukrainlarning uchdan to‘rt qismi (taxminan 75 foiz) quyidagilarni o‘z ichiga olgan tinchlik rejasini qabul qilib bo‘lmaydi deb hisoblaydi: xavfsizlik kafolatlari bo‘lmagan, ukrain qo‘shinlarini Donetsk viloyatidan olib chiqish ko‘zda tutilgan va UQK (Ukraina Qurolli kuchlari) sonini cheklash nazarda tutilgan reja. Bu haqda Kiyev xalqaro sotsiologiya instituti 26 noyabrdan 13 dekabrgacha Kiyev nazoratidagi Ukraina hududlarining barcha mintaqalarida 547 nafar respondent o‘rtasida o‘tkazgan so‘rovi natijalarida aytiladi. Tadqiqot natijalari 15 dekabr, dushanba kuni e’lon qilingan.

Respondentlarning 72 foizi esa quyidagi shartlarni o‘z ichiga olgan tinchlik rejasiga rozi bo‘lishi mumkinligini bildirgan: urushni hozirgi front chizig‘ida “muzlatib qo‘yish” va Ukraina uchun xavfsizlik kafolatlari — ammo okkupatsiya qilingan hududlarni rasman Rossiyaniki deb tan olmasdan. 14 foiz ishtirokchi bunday rejani ham rad etgan.

So‘rovda qatnashganlarning faqat 9 foizi Rossiyaning bosqini 2026 yil boshigacha tugaydi deb o‘ylaydi. 14 foiz — kelasi yilning birinchi yarmida tugaydi, deb hisoblaydi. 11 foiz — 2026 yilning ikkinchi yarmini aytgan, 32 foiz esa 2027 yil va undan keyin deb javob bergan. Har uchinchi respondent “bilmayman” deb javob qaytargan.

So‘rov shuni ham ko‘rsatganki, ukrainlarning 63 foizi urushga qancha kerak bo‘lsa, shuncha chidashga tayyor. Yana 15 foizi — olti oy yoki bir necha oy chiday olishini, 1 foiz — taxminan bir yil chiday olishini aytgan. 21 foiz respondent bu savolga javob bera olmagan.

Prezident Volodimir Zelenskiyga respondentlarning 61 foizi ishonadi, 32 foizi esa ishonmaydi. Oktyabr boshida ishonch reytingi deyarli shu ko‘rinishda bo‘lgan: 60 foiz ishonadi, 35 foiz ishonmaydi.

Ehtimoliy prezident saylovlari haqidagi savolga 57 foiz ishtirokchi saylovlarni faqat tinchlik kelishuvi tuzilib, urush to‘liq yakunlangandan keyin o‘tkazish mumkin, deb javob bergan. 25 foiz — o‘t ochish to‘xtatilib, xavfsizlik kafolatlari berilsa, saylov o‘tkazish mumkin, deb hisoblaydi. Faqat 9 foiz ukrain esa jang harakatlari davom etayotgan sharoitda ham saylov o‘tkazilishi kerak, deb o‘ylaydi.