Toshkentda yangi “siti”lar qurilishi kutilmoqda

Poytaxtda 37 gektar maydonni egallaydigan 1 mlrd dollarlik Uchtepa City qurilishi boshlanadi, deya ma’lum qildi prezident Shavkat Mirziyoyev. Chilonzor, Yakkasaroy va Olmazor tumanlarida ham 2,5 milliard dollarlik shunday loyihalar amalga oshirilishi kutilmoqda.

Foto: Prezident matbuot xizmati

Toshkent shahrida 37 gektar maydonda Uchtepa City loyihasi amalga oshiriladi. Bu haqda prezident Shavkat Mirziyoyev 16 dekabr kungi yig‘ilishda ma’lum qildi.

Davlat rahbariga ko‘ra, loyiha qiymati 1 mlrd dollar bo‘lib, uning doirasida zamonaviy mehmonxona, biznes markazlar, savdo-ko‘ngilochar majmua va apartamentlar quriladi.

Shuningdek, Chilonzor, Yakkasaroy, Olmazorda ham 2,5 milliard dollarlik shunday loyihalar amalga oshiriladi.

Mirzo Ulug‘bek, Yunusobod, Mirobod va Yashnobodda esa sun’iy intellekt, startap, fintex, moliya, tibbiyot va ta’lim sohasida 1 milliard dollarlik loyihalar amalga oshiriladi.